Žurnalisty francuzskaha infarmacyjnaha ahienctva AFP źniali repartaž pra «Našu Nivu» z nahody jaje viartańnia ŭ aficyjny raspaŭsiud.
Pahladzieć videa repartažu možna pa hetaj spasyłcy.
Dla tych, chto nie maje mahčymaści hladzieć videa, padajem tekst repartažu (u pierakładzie na biełaruskuju) i niekatoryja kadry:
U redakcyi «Našaj Nivy», najstarejšaj biełaruskamoŭnaj haziety, viruje praca. Ščyrujuć vałanciory.
Try hady tamu režym pazbaviŭ niezaležnuju hazetu mahčymaści raspaŭsiudu. Ale, dziakujučy rašučaści addanych čytačoŭ, jana zmahła vystajać – choć i ŭ padpolli.
Andrej Dyńko: «Ja nikoli nie dumaŭ, što my zmožam rabić heta try hady, ale my zdoleli. Dziakujučy našym čytačam, padpisčykam, jakija prychodziać u redakcyju i niasuć hazietu ŭ paštovyja skrynki».
Alaksandr – adzin z takich vałancioraŭ. Heta dosyć ryzykoŭny zaniatak. Niekalki jaho kalehaŭ-raspaŭsiudnikaŭ byli aryštavany padčas abychodu padpisčykaŭ. Ale heta tolki ŭzmacniaje jaho rašučaść.
Alaksandr Łahviniec: «Ja zusim nie bajusia, asabliva ŭ hety pieryjad, kali režymu vielmi patrebny niejki dyjałoh ź Jeŭrasajuzam. Chacia, nasamreč, režymu patrebnyja hrošy ad Jeŭrasajuzu. My pavinny być jašče bolš nastojlivymi».
Darja Katkoŭskaja: «Naša Niva» adyhryvaje vielmi važnuju rolu ŭ maim žyćci. Hetaja hazieta – adziny šlach dla mnohich ludziej daviedacca pra situacyju ŭ Biełarusi, palityku, padziei».
Sioleta adbyłosia niekalki stanoŭčych krokaŭ u bok palapšeńnia svabody presy. Niekalki palityčnych viaźniaŭ byli vyzvalenyja, i jość znaki taho, što «Naša Niva» i jašče adna «zabaronienaja» hazieta chutka atrymajuć mahčymaść viarnucca ŭ aficyjnuju sietku raspaŭsiudu. Ale jość sumnievy ŭ tym, nakolki daloka zojduć tyja źmieny.
Ihar Bastuniec: «Z adnaho boku, my pabačyli niekatoryja pasłableńni. Ale ź inšaha boku, naleta ŭstupić u dziejańnie novy zakon pra ŚMI, jaki budzie bolš žorstka rehulavać miedyi».
Niahledziačy na toje, što režym, mahčyma, chutka daść «Našaj Nivie» svabodu, zabarona na mnohija inšyja apazicyjnyja i niezaležnyja haziety zastaniecca. Značycca, takija vałanciory, jak Alaksandar Łahviniec, buduć praciahvać svaju pracu.
Aŭtary repartažu: R. Saržen, T. Kalinoŭskaja, AFP