Minekanomiki raspracavała prajekt Dziaržaŭnaj kompleksnaj prahramy madernizacyi ekanomiki.
Kryzis prademanstravaŭ niedastatkovuju efektyŭnaść čysta liberalnych madelaŭ ekanomiki va ŭmovach hlabalnaj recesii, miarkuje namieśnik dyrektara Navukova-daśledčaha ekanamičnaha instytuta Minekanomiki Viktar Pinihin. Na jaho dumku, liberalna-paternalisckaj madeli ekanamičnaha ŭładkavańnia robiacca ŭsio bolš papularnymi. U Biełarusi dobra zarekamendavała siabie ŭ pierachodny peryjad paternalisckaja madel, jakaja zasnoŭvajecca na dastatkova žorstkim administracyjnym rehulavańni, kaža ekanamist.
Siońnia ž administracyjnaja ekanomika svaje resursy vyčarpała i naśpieła nieabchodnaść madernizacyi. Što śviedčyć pra heta? Vysoki ŭzrovień znosu asnoŭnych srodkaŭ, niaznačnaja dola pradukcyi, što vyrablajecca na asnovie vysokich technalohij, a taksama tak zvany pierahreŭ ekanomiki.Jon vyklikany tym, što sukupny popyt u krainie pieravyšaje sukupnuju prapanovu. Popyt na tavary razahravajecca za košt rostu zarpłaty, kredytaŭ i źniešniaj zapazyčanaści.
V. Pinihin akcentavaŭ uvahu taksama na prablemach pradpryjemstvaŭ, što
vypuskajuć kankurentazdolnuju pradukcyju. Ichnyja mahutnaści zahružanyja amal na 100%, što stvaraje nacisk na vytvorčaść. Jak, naprykład, u budaŭnictvie, mahutnaściaŭ jakoj užo niedastatkova dla asvajeńnia ŭsich najaŭnych kapitalnych układańniaŭ.
Asnoŭnaja meta madernizacyi ekanomiki — pavyšeńnie kankurentazdolnaści. Ale madernizacyja, ličyć ekanamist, heta nia tolki ŭkaranieńnie adnych novych technalohij i abstalavańnia. Treba rabić akcent na madernizacyi ekanamičnych instytutaŭ i arhanizacyjna-ekanamičnych mechanizmaŭ.
Prajekt prahramy praduhledžvaje adychod ad rehulavańnia cenaŭ. Zachavajecca jano tolki adnosna abmiežavanaj kolkaści sacyjalna značnych tavaraŭ i na pradukcyju manapalistaŭ.
Minekanomiki taksama abiacaje ŭ čarhovy raz pasłableńnie ŭ padatkovaj sfery. Praduhledžvajecca admova ad padtrymki sielhasvytvorcaŭ. Budzie pierahledžany paradak adličeńniaŭ u inavacyjnyja fondy z pryncypovym źmianieńniem krynic ich vypłaty, dy ŭkaranieńnie systemy elektronnaha padatkovaha deklaravańnia.
Małomu i siaredniamu biznesu prajekt prahramy abiacaje źnižeńnie administracyjnych barjeraŭ i spraščeńnie praceduraŭ.
U halinie pryvatyzacyi čakajecca spraščeńnie pracedury vydzialeńnia ziamielnych učastkaŭ va ŭłasnaść i arendu, aptymizacyja doli dziaržavy ŭ akcyjanernym kapitale pradpryjemstvaŭ, utvareńnie instytutu daviernaha kiravańnia akcyjami.
Ajčynnyja pradpryjemstvy nie apynucca ŭ rukach namenklatury, upeŭnieny V. Pinihin, bo hetaha nie praduhledžvajuć prapanovy pa madernizacyi ekanomiki, sfarmulavanyja ŭ prajekcie prahramy.Razam z tym, ekanamist nahadaŭ, što siońnia dla Biełarusi aktualnaje pytańnie matyvacyi vyšejšych kiraŭnikoŭ. Jany, u vypadku paśpiachovaha kiravańnia, zmohuć atrymlivać svaju dolu akcyjaŭ pradpryjemstva.
Znajšłosia ŭ prajekcie madernizacyi ajčynnaj ekanomiki miesca j idei stvareńnia chołdynhaŭ na bazie dziaržaŭnych kancernaŭ. U jakaści prykładu pryvodzicca ideja stvareńnia lnianoha chołdynhu. Bolš nie vyklikaje strachu va ŭładaŭ mahčymaść uvachodžańnia našych pradpryjemstvaŭ u zamiežnyja transnacyjanalnyja karparacyi.