Z hetaj nahody na Biełaruskim telebačańni rychtujecca stužka, pryśviečanaja žyćciu paetki — pieršaja hruntoŭnaja praca pra žyćcio i śmierć «łastaŭki z Paleśsia», jak zvali jaje znajomyja.
Film pra Jaŭhieniju Janiščyc nie budzie čysta dakumientalnym. Akrom kalehaŭ‑litarataraŭ, jakija dobra jaje viedali, u filmie zadziejničany i aktory. Aŭtary taksama znajšli redkija videa‑ i aŭdyjo‑zapisy Janiščyc. Scenar napisała siabroŭka paetki, redaktarka časopisu «Maładość» Raisa Baravikova.
Jaŭhienija Janiščyc — nie ź liku tych, kaho nazyvajuć «niepryznanym tvorcam». Tak ličyć Raisa Baravikova.
‑ Ženia była vialikim žyćcialubam i dušoju našaj kampanii, choć u apošnija hady žyła davoli samotnym žyćciom žančyny, hadavała syna. Jana žyła tolki paezijaj. I jaje zaŭvažyli, aceńvali, jak śled. Uzhaharody tady davalisia tym, chto byŭ ideałahična pravilnym, ale nie zaŭvažyć jaje praniźlivuju liryku było niemahčyma.
U centry stužki — drama Jaŭhienii Janiščyc. Praź niekalki dzion paśla svajho 40‑hadovaha jubileju, jana ździejśniła samahubstva.Na zadumu aŭtaraŭ, u stužcy ŭviedzieny vobraz maładoj sučasnaj paetki, jakuju hraje Aksana Danilčyk. Pavodle scenaru, jana maje prajści šlacham Janiščyc i zrazumieć jaje ŭčynak.
Zdymki filmu «Na hołas muzy» ŭžo skončylisia i ciapier režysior Andrej Leŭčyk robić mantaž. Premjera zapłanavanaja na 30 listapada. Zdymačnaja hrupa nie paśpieła naviedać maci Jaŭhienii Janiščyc, jakaja pamierła letaś, admoviŭsia ad zdymkaŭ syn Andrej Janiščyc, jaki žyvie ŭ tym samym domie na vulicy Staražoŭskaj, 8.