Siońniašniaja presavaja kanferencyja Alaksandra Łukašenki pierad rasiejskimi žurnalistami, jakaja ŭ hetyja chviliny jašče doŭžycca, badaj, stanie nahladnaj ilustracyjaj papularnaj palitalahičnaj tezy pra maneŭravańnie aficyjnaha Miensku miž Zachadam i Rasiejaj.
Biełaruski aficyjny kiraŭnik, adkazvajučy na pytańni ŭdzielnikaŭ čarhovaha pres-turu, vykarystoŭvaje standartny pijaraŭski nabor, kab spadabacca rasiejcam (apafeoz: tanki na Maskvu nie prapuścim!). Ale staranna paźbiahaje kankretnych abiacańniaŭ.
Va ŭsiakim razie, jon daŭ zrazumieć, što pytańnie ab pryznańni miaciežnych hruzinskich pravincyj budzie razhledžana nia zaŭtra: "Prydzie čas, i my razhledzim hetaje pytańnie ŭ Biełarusi, hetak ža jak i ŭ Rasiei, u parlamencie. U nas vybary ciapier, i novy parlament razhledzić hetaje pytańnie".
Miž inšym, jašče budzie i sesija staroha składu Pałaty. Ale, naturalna, nia toj vypadak, kab afišavać :)
Paćviardžajecca prahnoz: u pytańni pra Abchaziju dy Paŭdzionnuju Asetyju Miensk budzie ciahnuć ryzinu da apošniaha. Tym časam jość šaniec zarabić bonusy ad Zachadu, kali vybarčaja kampanija projdzie farmalna bolej hładka, čym raniejšyja, dy ŭviančajecca achviaravańniem niekalkich mandataŭ apazycyi.
Łukašenka choć i dazvoliŭ sabie "paru łaskavych" na adras imperyjalistaŭ (niesumniennym chitom stanie "Kolki b my ni całavali Zachad u adpaviednyja miescy…"), ale ŭvohule praklamavaŭ žadańnie naładžvać dačynieńni, "bo inšaha vybaru niama".
Jon zajaviŭ: "My ni ź kim svarycca nie źbirajemsia, bo my most miž Zachadam i Rasiejaj". Supakoiŭ Eŭropu: jadziernuju zbroju raźmiaščać nie źbirajemsia, adzinaja systema SPA — heta, ličy, tolki biurakratyčnaje afarmleńnie toha, što ŭžo isnuje de-fakta. Što da "asymetryčnaha adkazu" na amerykanskija supraćrakiety, to, sa słoŭ Łukašenki, "nam treba niaśpiešna razam padumać".
Reziumavaŭ: nie paličycie, što ja tut vystupaju jak niejki jastrab!
Karaciej, i našym i vašym.
Maskva miž inšaha atrymała prazrystyja namioki, što za chaŭruśnictva treba płacić. Refrenam hučała: drać try skury za haz — nie pa-sajuźnicku! A ciapier, bač, i my vam spatrebilisia! Krasamoŭny pasaž: maŭlaŭ, Saakašvili vuń jakich droŭ nałamaŭ, ale ž Štaty jaho nie kidajuć, naadvarot — padkidajuć miachi z dalarami :).
Vyrazna prahučała i toje, što mienavita vajna na Kaŭkazie padkreśliła važnaść biełaruskaha suverenitetu. Ale jak chitra sfarmulavana, acanicie: "Apošnija padziei na Kaŭkazie pakazvajuć, čamu nielha ŭłučać Biełaruś u skład Rasiei, mnohija momanty paćviardžajuć heta. I mnohija palityki ciapier razumiejuć, što ŭ takim vypadku Rasieja stracić chaŭruśnika i subjekt mižnarodnaha prava".
Zastajecca pytańnie pra resurs takoha maneŭravańnia. Jon, darečy, moža, akazacca nie takim užo i mizernym. Maskva stała stračvać na abvastreńni stasunkaŭ z Zachadam "čysta kankretnyja babki", i tamu, mahčyma, stanie pakrysie pryhłušać isteryju.
