Rasiei pryjdziecca pieradrukavać mapy śvietu: na palityčnaj karcie ŭ maskoŭskaj versii źjavilisia dźvie novyja niezaležnyja dziaržavy.
«Uličvajučy svabodnaje volevyjaŭleńnie asiacinskaha i abchazskaha narodaŭ ... ja padpisaŭ ukazy ab pryznańni Rasiejskaj Federacyjaj niezaležnaści Paŭdniovaj Asiecii i Abchazii», — havorycca va ŭkazie Dźmitryja Miadźviedzieva.
Miadźviedzieŭ taksama zajaviŭ, što Rasieja padtrymlivaje ideju referendumu ŭ Paŭdniovaj Asiecii i Abchazii i ŭ dadzienaj sytuacyi ličyć za nieabchodnaje padtrymać imknieńnie narodaŭ niepryznanych respublik da niezaležnaści.
Pra heta prezydent Rasiei zajaviŭ siońnia na pasiedžańni Rady biaśpieki.
Miadźviedzieŭ pierakanany, što Hruzija sprabavała dałučyć Paŭdniovuju Asieciju canoj hibieli tysiač miascovych žycharoŭ. Jon zaznačyŭ, što šče ŭ 1991 h. Rasieja vyratavała nasielnictva Asieci i Abchazii ad źniščeńnia.
Miadźviedzieŭ padkreśliŭ, što imknieńnie Rasiei mirna raźviazać kanflikt praihnaravała jak sama Hruzija, jakaja «metadyčna rychtavałasia da vajny», tak i NATO i Eŭrasajuz. Takim čynam, Pucin-Miadźviedzieŭ vybrali šlach dalejšaha abvastreńnia adnosinaŭ z krainami Zachadu.
«Saakašvili abraŭ hienacyd dla vyrašeńnia svaich palityčnych zadačaŭ», — tak apraŭdaŭ svajo rašeńnie prezydent Rasiei.
U paniadziełak, 25 žniŭnia, paśla rašeńnia rasiejskaj Dziarždumy pra nadańnie niezaležnaści Abchazii i Paŭdniovaj Asiecii, krainy Zachadu źviarnulisia da rasiejskaha prezydenta z prośbaj, kab jon nie padpisvaŭ ukazu ab pryzańni.
Kali stała viadoma, što pryznańnie adbyłosia, ZŠA, Eŭrasajuz i ABSE vystupili z asudžeńniem kroku Rasiei. Kanclerka Niamieččyny nazvała rašeńnie «absalutna nieprymalnym».
Jak čakajecca, ES daść kančatkovuju acenku sytuacyi na nastupnym tydni: prezydent Francyi Nikala Sarkazi sklikaje ŭ symbaličny dzień 1 vieraśnia samit Eŭrasajuzu, kab abmierkavać sytuacyju ŭ Hruzii. Sustreča adbudziecca ŭ Bruseli.
Precedentami apošniaha času byli Erytreja, Tymor-Lešte i Kosava. U vypadku afrykanskaj i azijackaj krainaŭ isnavaŭ kansensus mižnarodnaje supolnaści. U vypadku Kosava rašeńnie prymałasia supolna zachodnimi vialikimi dziaržavami i isłamskimi krainami, niahledziačy na skiepsis ci supraciŭ Rasiei i Kitaju, i było padtrymanaje šaściu dziasiatkami krainaŭ.
Vypadak Asiecii i Abchazii roźnicca tym, što Rasieja dziejničaje adnaasobna. Kitaj staić za pryncyp terytaryjalnaje cełasnaści, a Maskvu na siońnia aficyjna padtrymali tolki čatyry krainy va ŭsim śviecie — Biełaruś, Venesueła, Kuba i Syryja. Sytuacyja blizkaja da taho, jakuju maje Turcyja z Respublikaj Paŭnočnaha Kipru.
Hruzija vusnami namieśnika ministra zamiežnych spravaŭ nazvała rašeńnie Maskvy «aktam aneksii hruzinskich terytoryj» i zajaviła, što dla Hruzii heta nia budzie mieć nijakaha jurydyčnaha značeńnia.
Prezydent ža Abchazii Siarhiej Bahapš nazvaŭ dzień 26 žniŭnia «histaryčnym» dla svajho narodu.
Dziejańni Maskvy buduć mieć praciahły ŭpłyŭ na mižnarodnuju sytuacyju. Jany pavyšajuć šancy na pieramohu kandydata-respublikanca Džona Makkiejna na prezydenckich vybarach u ZŠA. Što źviartaje ŭvahu — Maskva ažyćciaviła svaje namiery ŭ časie źjezdu Demakratyčnaj partyi ZŠA. Jany źmianiajuć taksama ŭnutrypalityčnaje stanovišča va ŭschodnieeŭrapiejskich krainach. Hetak, stała viadoma, što lider Partyi rehijonaŭ Ukrainy Viktar Janukovič zaklikaŭ Kijeŭ pryznać niezaležnaść padrasiejskich terytoryj.
Vyklučnaje značeńnie dla dalejšaha raźvićcia krainy maje vybar biełaruskaha kiraŭnictva ŭ dadzienaj sytuacyi.
Maskva budzie patrabavać, kab Biełaruś pryznała niezaležnaść vasalnych terytoryj Rasiei. U toj ža čas ŭklučeńnie novych «respublik» u skład sajuznaje dziaržavy aŭtamatyčna pieraviadzie Biełaruś u ranh jašče adnoj asiecii, tolki bolšaha pamieru.Taksama i prostaje pryznańnie Mienskam niezaležnaści novych dziaržavaŭ pryviadzie da ŭzmacnieńnia izalacyi Biełarusi ŭ Eŭropie — naša kraina ŭmacuje svoj imidž «klijenta Maskvy».
Tym nia mienš, vyklučać takoje raźvićcio padziejaŭ nie vypadaje. Za apošnija 10 hadoŭ Biełaruś pryniała ličanyja samastojnyja rašeńni na mižnarodnaj arenie. Maskva ž pa-raniejšamu vykarystoŭvaje lhotnyja ceny na haz i naftu dla cisku.
Łukašenka byŭ adzinym kiraŭnikom dziaržavy, akramia Rasiei, jaki sustreŭsia z prezydentami Asiecii i Abchazii i vykazaŭ na tym spatkańni dumku, što «i narod Asiecii, i narod Abchazii ŭ składzie Hruzii žyć nia mohuć».
MZS zachavaŭ maŭčańnie pa stanie na viečar aŭtorka. Tym časam deputaty Mikałaj Čarhiniec, Uładzimier Barščoŭ, Siarhiej Kaścian, Siarhiej Hajdukievič, jakija naležać da kamisij pa mižnarodnych spravach savietu respubliki i pałaty pradstaŭnikoŭ, u adzin hołas uchvalili rašeńnie Rasiei i abrynulisia na Zachad. «Rasieja rašyła ŭstać z kalen», — zajaviŭ Hajdukievič. «Siońnia jość usie padstavy, kab padtrymać u hetym pytańni Rasieju», — kaža Barščoŭ. U biełaruskaj systemie deputaty prosta tak svaich mierkavańniaŭ nie vykazvajuć.
