U Tadžykistanie ŭ domie baćkoŭ staršaha śledčaha antykarupcyjnaha orhana Firdaŭsa Nijozbadałava znojdzieny bunkier, u jakim zachoŭvalisia 19 miljonaŭ dalaraŭ, miaški z zołatam, kaštoŭnymi kamianiami i šeść džypaŭ. Pra heta paviedamiła tadžykistanskaje vydańnie «Achbor», piša Tut.by.
Tut i nižej fota akhbor.com
Tajnik byŭ vyjaŭleny ŭ horadzie Buston (były Čkałaŭsk) padčas pieratrusu uładańniaŭ baćkoŭ Nijozbadałava supracoŭnikami DKNB (Dziaržkamiteta nacyjanalnaj biaśpieki Tadžykistana).
Nijozbadałaŭ — ziać byłoha sakratara Savieta nacyjanalnaj biaśpieki Amirkuła Azimava. Tajnik byŭ u domie ŭ baćki, Abduhafora Nijozbadałava, byłoha namieśnika prakurora Sahdyjskaj vobłaści. Jaho prastorny asabniak składajecca z šaści damoŭ z kamierami videanazirańnia, padziemnymi haražami i, jak pakazaŭ uładalnik, — z bunkieram.
Pavodle danych śviedak, starejšy Nijozbadałaŭ dobraachvotna pakazaŭ śledčym uvachod u bunkier, jaki byŭ praktyčna niezaŭvažny.
Jaho žonka akazała luty supraciŭ śledčym i pahražała samaspaleńniem. Žančyna ŭsialak vyharodžvała syna, zajaŭlajučy, što ŭsio znojdzienaje naležyć im z mužam.
Mnostva śviedkaŭ, jakija sabralisia kala asabniaka, bačyli, jak ź jaho vynosili niekalki miaškoŭ z dalarami, zołatam i kaštoŭnymi kamianiami, a taksama vykočvali šeść džypaŭ.
U ciapierašni čas u Tadžykistanie pravodzicca sieryja aryštaŭ byłych i dziejnych supracoŭnikaŭ antykarupcyjnaha viedamstva.