Hruzinskija vojki nia tolki ryŭkom uziali Cchinvali — jany akazali niečakana ŭpartaje supraciŭleńnie rasijskaj armii, što ŭstupiła ŭ Hruziju amal imhnienna. Pryčym hruziny vajavali nie pa-saviecku — ličbaju, a ŭmieńniem. Jany ŭnikali niebiaśpiečnych bojesutyknieńniaŭ, pakidali stratehična niaznačnyja nasielenyja punkty, ale nanosili praciŭniku maksymalnuju škodu. Pavodle zajavaŭ hruzinskaha boku, im udałosia źbić 17 rasiejski[ samalotaŭ i 4 viertaloty. Rasieja pryznaje stratu tolki 4-ch mašynaŭ, u tym liku stratehičnaha bambavika Tu-22. Heta ŭ lubym razie bolej, čym straciła ZŠA za aktyŭnuju fazu bajavych dziejańniaŭ u Iraku. Rasieja straciła ŭ zonie kanfliktu z Hruzijaj 74 vajskoŭcy zabitymi, 171 — paranienymi, 19 čałaviek prapali biaź viestak. Takija ličby padaŭ u sieradu na bryfinhu namieśnik načalnika Hienštabu Rasiei Anatol Nahavicyn.
Saakašvili taksama zajaviŭ, što rasiejskija vojski panieśli straty ŭ 400 čałaviek zabitymi.
Z hruzinskaha boku zahinuła 175 hramadzianaŭ, paviedamiŭ ministar achovy zdaroŭja Hruzii Sandro Kvitašvili. Kala dziasiatka hruzinskich sałdat uziatyja ŭ rasiejski pałon. Kolki z 175-ci vajskoŭcaŭ — nie paviedamlajecca.
Jakim čynam kraina, što jašče čatyry hady tamu ličyłasia niedadziaržavaj i dzie siaredni zarobak składaŭ 5 dalaraŭ za miesiac, zdoleła stvaryć bajazdolnuju armiju? I ci majuć pad saboj hrunt śćviardžeńni, što pierachod ad aŭtarytaryzmu da demakratyi, ad prarasiejskaje da praeŭrapiejskaje aryjentacyi i ad dziaržaŭnaje da pryvatnaje ŭłasnaści kaniečnie viadzie da asłableńnia jakaści siłavych strukturaŭ, jak toje adbyłosia ŭ aliharchičnych Rasiei i Ŭkrainie?
Artykuł analityka Felhienhaŭera źjaviŭsia ŭ rasijskaj «Niezavisimoj hazietie» napiaredadni kanfliktu — heta byŭ adkaz na raniejšyja šapkazakidacielskija publikacyi na temy Hruzii ŭ vajskovaj dadatku da «Niezavisimoj haziety».
Hruzinskija zbrojnyja siły majuć kiepskuju reputacyju, asabliva ŭ Rasiei, paśla ichnych parazaŭ u 1992 h., kali hruziny biespaśpiachova šturmavali paŭdniovaasiacinskuju stalicu Cchinvali (kanflikt skončyŭsia pry pasiarednictvie Maskvy faktyčna ŭničyju — padziełam Paŭdniovaj Asiecii na hruzinskuju i asiacinskuju zony kantrolu).
U žniŭni 1992-ha vojski dziaržrady, jakaja kiravaŭ tady ŭ Tbilisi, uvarvalisia ŭ Abchaziju. Zrešty, nazyvać ich «vojskami» — zašmat honaru. Heta byli, najchutčej, bandfarmavańni ŭ najhoršym značeńni hetaha słova: bajeviki z arhanizacyi «Mchiedryjoni» viadomaha złačyncy ŭ zakonie Džaby Jasielijani i «nacyjanalnaja hvardyja» Tenhiza Kitavani. Chiba što jany mieli šmat zbroi i braniatechniki — udarnyja viertaloty, atrymanyja pa raździele z rasiejskim bokam savieckaj vajskovaj majomaści na terytoryi Hruzii.
Nia tolki ŭ Paŭdniovaj Asetyi i ŭ Abchazii, ale va ŭsioj Hruzii bajevikoŭ «Mchiedryjoni» i inšuju ŭzbrojenuju šušamieć pačatku 90-ch uzhadvajuć ź nianaviściu. Jasielijani paźniej pamior u Tbilisi pry ćmianych abstavinach, a Kitavani žyvie sabie, vałodaje restaracyju ŭ Maskvie, dzie rasiejskija ŭłady dali jamu palityčny prytułak.
Bolš jak hod praciahvałasia vajna ŭ Abchazii i skončyłasia ŭ 93-m poŭnym razhromam i vyhnańniem hruzin, ułučna z 250 tys. mirnaha nasielnictva. Mienavita z taje pary zachavałasia ŭstojlivaja nehatyŭnaja acenka bajavych mahčymaściaŭ hruzinskaj dziaržavy i nacyi. Choć dziela spraviadlivaści varta ŭličyć, što pieramahčy abchazam aktyŭna dapamahała Rasieja i dobraachvotniki z Paŭnočnaha Kaŭkazu, ułučna z čačenskimi bajevikami Šamila Basajeva, a rasiejskija lotčyki tajemna bambili hruzinskija pazycyi. Aproč taho, kali ŭ vieraśni 93-ha abchaskija ŭtvareńni pačali rašučy šturm Suchumi, u tyle ŭ hruzinskaj hrupoŭki ŭ Zachodniaj Hruzii pačałosia paŭstańnie prychilnikaŭ byłoha prezydenta Źvijada Hamsachurdzija.
Z taje pary jašče
doŭha hruzinskaja dziaržava i jaje zbrojnyja siły pierabyvali ŭ samym ubohim stanie.Paśla 2001 h. u ramkach suśvietnaj vajny z teraryzmam ZŠA pačali za svoj košt abstaloŭvać i navučać niekalki hruzinskich bataljonaŭ dla viadzieńnia antypartyzanskich, antyterarystyčnych aperacyj i pieradali zadarma 10 starych transpartnych viertalotaŭ «Irakiez» UH-1H. Ale zbolšaha prezydentu Michaiłu Saakašvili i jahonym prychilnikam, jakija zrynuli Eduarda Ševardnadze pry kancy 2003-ha ŭ vyniku «revalucyi ružaŭ», dastalisia kiepska abvučanaja i ŭzbrojenaja armija i mała na što prydatnyja avijacyja i karabli.
Ŭletku 2004 h. hruziny pasprabavali abłažyć Cchinvali, parušyŭšy ŭstojlivaje z 1992 h. pieramirje ŭ Paŭdniovaj Asetyi, zasnavanaje na supolnym tranzytnym kantrabandnym handli praz Rokski tunel u Rasieju. Ale ŭ 2004-m hruziny pad Cchinvali ničoha nie damahlisia, tolki zaznali istotnyja straty. Saakašvili, pravilna acaniŭšy niaŭdaču, rašuča ŭziaŭsia za vajskovuju reformu.
U Rasiei skłałasia całkam skažonaje ŭjaŭleńnie pra novuju hruzinskuju kiraŭničuju elitu. Saakašvili — mocny, razumny, metaskiravany i vielmi enerhičny nacyjanalny lider. Jon, što praŭda, vielmi nieciarplivy, sprabuje ŭ zakarotki termin pierarabić Hruziju i hruzin ź ćviordym pierakanańniem, jak svaim časam Piotar Vialiki, što viedaje lepš za ŭsich, što trebajahonaj krainie i narodu. Kamanda Saakašvili składajecca zbolšaha z maładych, navučanych na Zachadzie, enerhičnych i spraŭnych ludziej. Jany zdoleli za čatyry hady pierarabić Hruziju, jak nichto nia moh čakać.
U Hruzii nie zmahalisia nibyta z karupcyjaj, adnačasova razvažajučy pra niepaźbiežnaść hetaha licha — jaje zusim na ździŭleńnie praktyčna likvidivali. Pakul u Rasiei niaśpiešna cielapali jazykami pra nieabchodnaść vajskovaj reformy, pra madernizacyju Zbrojnych siłaŭ, pra «inavacyju armii» — u Hruzii stvaryli z nula zbrojnyja siły novaha ŭzoru. Tolki adčajnym nievuctvam možna było vytłumačyć rasiejskija sproby pastavić Hruziju na kaleni, zabaraniajučy ŭvoz vina i baržomu, pierakryvajučy elektryčnaść i haz, zabaraniajučy hrašovyja pierakazy i prostyja avijarejsy, uvodziačy vizavy režym. Nieŭzabavie vyśvietliłasia, što efekt ad sankcyj blizki da nulavoha, što «hruzinskaje vino» dla RF vyrablałasia na Paŭnočnym Kaŭkazie, što Maskva nia moža kantralavać mižnarodnuju systemu bankaŭskich pierakazaŭ, što ŭ Tbilisi lohka znajšli zamienu našamu hazu i elektraenerhii, što letaś, u pryvatnaści, hruzinski VUP vyras na 16 %. Pry hetym vidavočnaja niedaacenka ciapierašniaj hruzinskaj armii moža stacca jašče bolš niebiaśpiečnaj u vypadku mahčymaha mižnarodnaha vajennaha kanfliktu.
Šparki rost ekanomiki, masavaja pryvatyzacyja dziaržaŭnaj majomaści na adkrytych dla zamiežnikaŭ tenderach papoŭnili hruzinski biudžet. Za čatyry hady vajskovyja vydatki vyraśli ŭ 30 ź niečym razoŭ, dasiahnuŭšy 9—10 % VUP.U apošni hod kiravańnia Ševardnadze — u 2003-m — vajskovy biudžet Hruzii byŭ 30 młn dalaraŭ. U 2004-m — 90 młn. U 2005-m — blizka 200 młn. U 2006-m — kala paŭmiljarda. U 2007-m vajskovy biudžet dvojčy pierahladali ŭ bok pavyšeńnia, i da kanca hodu byŭ vydatkavany 1 młrd dalaraŭ. Na 2008-y hruzinski parlament uchvaliŭ vajskovyja vydatki na 800 młn dalaraŭ, ale, sa słovaŭ ministra abarony Davida Kiezierašvili, «heta pakul». Ciaham hodu vajskovyja vydatki, biessumniŭna, vyrastuć i zaležna ad raźvićcia sytuacyi mohuć skłaści ad 1,5 da 2 młrd dalaraŭ.
Vielmi vialikija dla Hruzii hrošy byli patračanyja całkam razumna.
U Hruzii spynili pryzyŭ u vojska i ŭtvaryli bajazdolnaje rehularnaje achvotnickaje vojska likam bolš jak 30 tys. žaŭnieraŭ. Aproč taho, zaćvierdžanaja kancepcyja narodnaj «tatalnaj abarony», ale korpus rezervistaŭ mierkavanym likam 100 tys. čas. utvarajuć pa-amerykansku, stvarajučy dobraachvotnuju nacyjanalnuju hvardyju.Jak śćviardžaje hruzinskaje Ministerstva abarony, na travień hetaha hodu padrychtavana 40 tys. rezervistaŭ ź liku hramadzian-dobraachvotnikaŭ, jakija nie słužyli, i jość jašče aktyŭny rezerv z byłych žaŭnieraŭ likam da 25 tys. čałaviek. U ciapierašni čas u Hruzii ŭtvarajucca pieršyja 4 bryhady nacyjanalnaj hvardyi na padstavie ŭžo ŭtvoranych terytaryjalnych bataljonaŭ. U mirny čas bryhady buduć kadravanyja (pa 47 aficeraŭ i siaržantaŭ rehularnaj słužby ŭ kožnaj), pry pahrozie — razhortvacca ŭ poŭnuju moc. Mabilizacyja hruzinskich dobraachvotnikaŭ-rezervistaŭ całkam zabiaśpiečanaja zapasami ŭzbrajeńnia, bojeprypasaŭ i techniki savieckaha ŭzoru.
Ad siaredziny traŭnia ŭ Hruzii iduć masavyja zbory rezervistaŭ na pierapadrychtoŭku. K pačatku mahčymaha ŭ bližejšym časie poŭnamaštabnaha zbrojnaha kanfliktu ŭ Abchazii i Paŭdniovaj Asetyi Hruzija padyšła ŭ vysokaj mabilizacyjnaj hatoŭnaści. Častki nacyjanalnaj hvardyi mohuć być vykarystanyja dla vykanańnia dapamožnych abaronča-achoŭnych zadač. U vypadku zaciahłaha kanfliktu padrychtavanyja rezervisty mohuć słužyć krynicaj papaŭnieńnia dla rehularnych častak.
Vojska Hruzii składajecca z šaści rehularnych bryhad. 4 hruzinskija piachotnyja bryhady źjaŭlajucca całkam samastojnymi złučeńniami pa 3300 čałaviek i składajucca z troch piachotnych bataljonaŭ z 591 čałavieka, 1 braniatankavaha (mechanizavanaha) bataljona, artyleryjskaha bataljona, rotaŭ suviazi, tyłu, inžynierna-sapiornaj. U ciapierašni čas u składzie piachotnych bryhad adbyvajecca padvajeńnie liku tankaŭ: braniatankavy bataljon pieraŭtvarajecca ŭ 2 tankavyja roty i 1 rotu motapiachoty. Značnaja častka asabovaha składu hruzinskaj piachoty prajšła abkatku ŭ Iraku, dzie i siońnia razhornuta bolš jak 2 tys. hruzinskich vajskoŭcaŭ (treci pa vieličyni kantynhient paśla ZŠA i Brytanii — Red.).
Hruzinskija piachotnyja bryhady padrychtavanyja pieradusim dla viadzieńnia vajskovych dziejańniaŭ u horna-lasistaj miascovaści i pavodle štatnaha raskładu ŭzbrojenyja minamiotami. Usia daŭhastvolnaja artyleryja, samachodnyja i buksiravanaja, a taksama systemy załpavaha ahniu źviedzienyja ŭ adzinuju artyleryjskuju bryhadu. Paraŭnalna małyja pamiery patencyjnaha teatru vajskovych dziejańniaŭ u Abchazii i Paŭdniovaj Asiecii, a taksama dastatkova hustaja sietka daroh, vidavočna, dazvolać hruzinskamu kamandavańniu efektyŭna maneŭravać źviedzienymi ŭ adziny kułak ciažkaj artyleryjaj i SZA, stvarajučy ahniavuju pieravahu ŭ patrebny čas u patrebnym miescy.
Častki hruzinskaha armiejskaha specnazu źviedzienyja ŭ bryhadu specyjalnaha pryznačeńnia. Usie viertaloty pieradadzienyja z armiejskich bryhad i specnazu ŭ vajskova-pavietranyja siły, dzie ciapier jość 6 eskadryljaŭ. Dźvie transpartnyja: Mi-8 i UH-1H. Dźvie ŭdarnyja: Su-25 i źmiašanaja Mi-8/Mi-17, Mi-24. Adna vučebnaja — Ł-39. Adna — bieśpiłotnikaŭ (BPŁA — bieśpiłotny latalny aparat). Planujecca na budučyniu skancentravać usie najaŭnyja BPŁA ŭ składzie adzinaha armiejskaha vyviednaha bataljonu. Zenitna-rakietnyja kompleksy sabranyja ŭ składzie VPS, a armiejskija častki nasyčanyja pieranosnymi zenitnymi rakietnymi kompleksami (PZRK). Stvorany, abstalavany i funkcyjanuje sučasny adziny aperacyjny kamandny centar viadzieńnia pavietranaj abarony. Terytoryja Hruzii, ułučna z Abchazijaj i Paŭdniovaj Asetyjaj, nakrytaja adzinym radyjolakacyjnym polem.
U składzie VMF dva rakietnyja katery: saviecki prajektu 206MR z rakietami P-20 i francuski z rakietami «Ekzaset». Jość vartavyja i desantnyja katery. Hruzinskaje Minabarony miarkuje, što ciapierašni VMF słaba padrychtavany da viadzieńnia marskoj vajny i moža tolki demanstravać ściah. Zrešty, abchaski samapalny flot dyk i jašče słabiejšy. Asabovy skład rehularnych suchadolnych častak — bolš za 17 tys., VPS — 2000, VMF — 700, centralny administracyjny aparat, słužba tyłu i inšyja dapamožnyja słužby — bolš za 9000 čałaviek. Hieneralny štab pieraŭtvorany pavodle zachodniaha ŭzoru ŭ Abjadnany štab.
Unutranyja vojski MUS pieradadzienyja ŭ skład Minabarony. U składzie MUS 15 tys. palicyjantaŭ, jość taksama niekalki specbataljonaŭ, razhornutych u zonie procistajańnia ŭ Abchazii i Paŭdniovaj Asiecii, dzie pahadnieńni pra spynieńnie ahniu abmiažoŭvajuć ci zusim zabaraniajuć prysutnaść armiejskich častak. Jość bataljon palicejskaha specnazu ŭ Tbilisi, abstalavany i navučany procistajać masavym biesparadkam (kštałtu AMAPu).
U vypadku poŭnamaštabnaha zbrojnaha kanfliktu ŭ Abchazii i Paŭdniovaj Asiecii ŭ hetym hodzie hruziny zmohuć pastavić pad ružžo da 80 tys. čałaviek. U vypadku praciahłaha kanfliktu — da 100 tys. U 2009-m vykanańnie zaplanavanych mierapryjemstvaŭ vajskovaha budaŭnictva značna pavialičyć abaronnyja mahčymaści hruzinskaj dziaržavy ŭ jakaści i kolkaści, tamu siońnia Tbilisi nia maje nijakaha abjektyŭnaha intaresu inicyjavać vajnu mienavita ciapier.
Zbolšaha ciapierašniaja arhanizacyja vajskovych siłaŭ Hruzii vyhladaje razumna zbalansavanaj, jana adpaviadaje mahčymaściam dziaržavy i nadzionnym zadačam.
Paralelna z vybudovaj abaronnych struktur urad Saakašvili zaniaŭsia jakasnym pieraabstalavańniem Zbrojnych siłaŭ. U 2007 h. pačalisia pastaŭki samaj sučasnaj techniki i ŭzbrajeńniaŭ, jakich nia majuć ni asiacinskija, ni abchaskija, ni rasiejskija vojski.
Hruziny zakupili niekalki dziasiatkaŭ izrailskich BPŁA roznych papieraŭ i pryznačeńnia. Hetyja bieśpiłotniki zdolnyja źbirać i pieradavać u režymie realnaha času vyviednyja dadzienyja pra praciŭnika va ŭsiaki čas dnia ci nočy, ułučna z GPS-kaardynatami celaŭ. Taksama Hruzija nabyła ŭ Izrailu: kamputarnuju systemu kiravańnia bajavymi dziejańniami i celeŭkazańniu, spałučanaja z BPŁA, 155-milimetrovyja samachodnyja haŭbicy, zdolnyja vykarystoŭvać dadzienyja bieśpilotnych aparataŭ dla vysokadakładnaj stralby z GPS-prycelvańniem na adlehłaści da 40 km. Siońnia 200 izrailskich vajskovych kantraktnikaŭ rychtujuć hruzin da viadzieńnia sučasnaj sietkavacentryčnaj vajny z masavym vykarystańniem tannaj vysokadakładnaj zbroi na hruncie GPS.
Artyleryja i RSZO «Hrad» savieckaha ŭzoru, jakich u hruzinskaj armii niamała, nia mohuć być naŭprost intehravanyja ŭ kamputaryzavanuju sietku sučasnaha vysokadakładnaha ŭžyvańnia ahniavych srodkaŭ paražeńnia. Ale, sa słovaŭ namieśnika ministra abarony Batu Kutelija, razhladajecca častkovaja intehracyja: istotnaje pavyšeńnie dakładnaści stralby z vykarystańniem dadzienych BPŁA dla karektavańnia ŭ realnym časie.
Hruzinskija kiraŭniki śćviardžajuć, što z dapamohaj izrailcaŭ madernizavali 7 šturmavikoŭ Su-25 dla vykarystańnia ŭnačy i ŭ kiepskaje nadvorje. Vykarystoŭvajučy źviestki BPŁA ź infračyrvonymi kamerami, hruzinskija vajskoŭcy, vidavočna, mohuć užo siońnia vajavać unačy, vykarystoŭvajučy niepasrednuju padtrymku ŭdarnaj avijacyi i ciažkoj artyleryi, kali ich patencyjnyja praciŭniki — raznamasnyja ŭtvareńni separatystaŭ, paŭnočnakaŭkaskich dobraachvotnikaŭ, dyj rasiejskija vojski — ślapyja i praktyčna biezabaronnyja.
Padrychtoŭka i bajavy duch asabovaha składu hruzinskaj armii ŭ cełym adpaviadajuć novaj arhanizacyi Zbrojnych siłaŭ i zakuplenamu sučasnamu ŭzbrajeńniu.
Siońnia ŭ Hruzii vysoki prestyž vajskovaj i palicejskaj słužbaŭ. Žaŭniery i aficery atrymlivajuć istotnyja ŭ hruzinskich maštabach hrošy — ad 500 da 1000 dalaraŭ za miesiac.Pabudavanyja adpaviednyja zachodnim standartam vajskovyja bazy ŭ Senaki, Choni, Hory, Kutaisi, dla siłaŭ MUS u hruzinskim sektary Paŭdniovaj Asiecii. Saakašvili časta naviedvaje bazy svajho vojska, načuje tam i jeść sałdackuju ježu. Dla dadatkovaha źjadnańnia asabovaha składu žaŭniery i kamandziry pa-amerykansku jaduć razam u adnych stałoŭkach adnolkavuju ježu. Kormiać dobra. U rasiejskaj armii i flocie padobnaje niejmavierna.
U Hruzii dziejničajuć nacyjanalnaja vajskovaja akademija dla małodšych aficeraŭ i stvoranaja ź niamieckaj dapamohaj škoła dla padrychtoŭki prafesijnych siaržantaŭ. Staršych aficeraŭ rychtujuć u zachodnich vajennych akademijach. Z francuskaj dapamohaj stvoranaja škoła hornaj vajny. Hruzinskija hornyja instruktary prajšli navučańnie ŭ francuskich i švajcarskich hornych vojskach i dvojčy na hod kamandzirujucca ŭ Francyju dla pierapadrychtoŭki. Badaj, Saakašvili zdoleŭ stvaryć za karotki termin choć nievialikuju, ale samuju jakasnuju armiju na postsavieckaj prastory.
U sučasnaj Hruzii nichto, navat najbolš pa-siabroŭsku nastrojenyja da Rasiei ludzi, nie hatovy addać Abchaziju i Paŭdniovuju Asieciju biaz boju. U vypadku zbrojnaha kanfliktu hruzinskija žaŭniery i rezervisty-dobraachvotniki buduć vajavać za vyzvaleńnie rodnaha kraju i viartańnie sotniaŭ tysiač uciekačoŭ, adčuvajučy padtrymku ŭsiaho narodu.
U praciŭnikaŭ hruzin sytuacyja inšaja. Paśla masavaj razdačy žycharam Abchazii i Paŭdniovaj Asiecii rasiejskich pašpartoŭ abiedźvie žabračyja samaabvieščanyja respubliki kančatkova abiaźludnieli — pačałasia masavaja mihracyja ŭ Rasieju, u Tureččynu ŭ pošukach pracy i lepšaha žyćcia. Pavodle acenak mižnarodnych naziralnikaŭ z ABSE i AAN, u Paŭdniovaj Asiecii siońnia zastałosia mienš jak 30 tys. asiacinaŭ, a ŭ Abchazii z 140 tys. pastajannaha nasielnictva — abchazaŭ tolki 30 %.Samaja šmatlikaja supołka siońniašniaj Abchazii — armianie, jość rasiejcy i inšyja, u Halskim rajonie da 50 tys. hruzin, jakija viarnulisia. Ale va ŭładzie, u siłavych strukturach spres abchazy, jakija prezentujuć roznyja kłany, i tolki trochi jany razbaŭlenyja prykamandziravanymi rasiejskimi specyjalistami.
Małaimavierna, što hvałtoŭna mabilizavanyja hramadzianie niatytulnych narodaŭ buduć masava samaachviarna zmahacca za zachavańnie abchaskaj etnakratyi. U Abchazii ŭ mirny čas pad ružžom 4500 čałaviek, u vypadku vajny možna mabilizavać jašče da 10 tys. U asiacinaŭ da 3000 pastajannaha vojska, a mabilizacyjny resurs faktyčna ŭvieś pierajechaŭ na terytoryju Rasiei. U asiacinaŭ i abchazaŭ niamała staroj artyleryi i braniatechniki, ale ŭ vypadku poŭnamaštabnaha kanfliktu jany zmohuć samastojna vyrašać tolki dapamožnyja zadačy, a realna vajavać i zaznavać straty praktyčna ź pieršaha dnia daviadziecca našym vajskoŭcam, inačaj samaabvieščanyja respubliki vielmi chutka parassypajucca ŭščent.
Ale, sa słovaŭ pieršaha namieśnika ministra abarony Rasiei hienerała Alaksandra Kałmakova, padrychtoŭka i abstalavańnie rasijskich vojskaŭ i siłaŭ fłotu «adpaviadaje ŭzroŭniu 60—70-ch hadoŭ XX stahodździa». Tamu ciažkaj budzie dla našych niedefarmavanych Zbrojnych siłaŭ zadača efektyŭna vajavać na čužoj terytoryi, za nieprachodnym uzimku i ciažkaprachodnym uletku Kaŭkaskim chrybtom.
Dadatkovaja infarmacyja: Analiz razhromu štabnoj kalony 58-j armii hruzinskimi vojskami..
Jašče videa:
Vajskovy parad u Tbilisi:
Amerykanskija instruktary trenirujuć hruzinski atrad na vajskovaj bazie ŭ Kuvejcie:
