Paru hadzinaŭ pierad viartańniem u kaloniju Alaksandar Kazulin pravioŭ u ofisie BiełaPANu. Spačatku była anlajnavaja kanferencyja, a potym — razmova z žurnalistami ŭ reale. Abodva mierapryjemstvy daviałosia hranična ściskać. Biełaruskaja specyfika: palityk musiŭ skamiečyć hutarku z presaj, bo ŭžo byŭ čas viartacca za kraty. I hety palityčny "siur" my bačym u centry Eŭropy ŭ XXI stahodździ...
Pieršaje ŭražańnie: Kazulin staŭ idealistam. Asobnyja pasažy hučali prosta afarystyčna: "Niemahčyma adkrucić čas nazad. Kožnuju chvilinu my žyviem u novym śviecie. I važna rabić vysnovy, nabyvać dośvied, vučycca na ŭłasnych pamyłkach".
Jon šmatkroć zhadvaŭ, što ŭsie my pad Boham chodzim, zaklikaŭ uładu da pakajańnia, prapanoŭvaŭ padvieści rysu pad peryjadam kanfrantacyi jak u apazycyi, tak i ŭva ŭsim hramadztvie. Kazaŭ, što hatovy ščyra praciahnuć ruku Łukašenku, sieści za stoł pieramovaŭ, što jon i jahonaja siamja ŭsio darujuć…
Nu a kali ŭłada nie paciśnie praciahnutuju ruku, dyk tady što: čakać z mora pahody, spadziavacca na maralnuju evalucyju kiroŭnaj viarchoŭki — ci ŭsio ž vy bačycie niejki mocny scenar palityčnaj baraćby za pieramieny? Na hetaje svajo pytańnie ja, ščyra kažučy, nie pačuŭ naŭprostavaha adkazu. Znoŭ prahučała, što ŭłada musić pakajacca, što šlach kampramisu, pieramovaŭ — heta prapanova nia tolki jaho, Kazulina, ale, kali chočacie, "prapanova niabiosaŭ". I kali my nia možam źmianić śviet, to musim źmianić samich siabie — "i tady śviet stanie čyściejšym, lepšym, śviatlejšym i dabrejšym".
Siońniašni Kazulin ničym nie nahadvaŭ toha, jakim jon zapomniŭsia padčas vybarčaj kampanii 2006 hodu. I reč nia tolki ŭ tym, što źmianilisia čas dy abstaviny. Vyhladaje na toje, što značna źmianiŭsia jon sam. Zrešty, jon tak i skazaŭ: "Siońnia ja pračnuŭsia inšym čałaviekam". Zajaviŭ, što bolej nia budzie trymać haładovak ("Haspodź mnie skazaŭ, što ja nie zavieršyŭ jašče svaje spravy na ziamli"), a taksama nie źbirajecca vysoŭvać ultymatumy ŭładzie. Padkreśliŭ, što "čas razborak" prajšoŭ, na hvałt nielha adkazvać hvałtam, a "miesca pad soncam chopić usim".
Zrazumieła: dva hady niavoli sami pa sabie mahli spryjać unutranaj evalucyi ŭ bok filazafičnaha, relihijnaha śvietapohladu. Plus trahičnaja historyja chvaroby i śmierci žonki.
Razam z tym, šmat dla kaho Kazulin zastajecca ŭ vobrazie hetakaha terminatara, hatovaha na samyja adčajnyja kroki. Ci nia stanuć ramantyčnyja razvahi pra nieabchodnaść kansalidacyi ŭłady dy jejnych apanentaŭ na hlebie maralnych kaštoŭnaściaŭ i h.d. momantam rasčaravańnia dla tych, chto bačyć u asobie Kazulina najbolej rašučuju, mocnuju alternatyŭnuju fihuru na biełaruskim palityčnym poli?
Adzin ź jahonych paplečnikaŭ tet-a-tet skazaŭ mnie: usio narmalova, Kazulin za hety peryjad, naadvarot, staŭ macniejšy ŭ palittechnalohijach. Prosta zaraz nia čas.
Zrazumieła, što ciaham hetych troch dzion na voli adsočvaŭsia kožny krok, fiksavałasia kožnaje słova. I varta zaznačyć, što ni sam Kazulin, ni jahonyja paplečniki, ni ŭsie tyja, chto padzialiŭ jahony smutak, nie dali padstaŭ dla pravakacyj, dla vysnoŭ kštałtu: nu voś, bačycie, jakaja kaša moža zavarycca, kali naša humannaja ŭłada pojdzie na daterminovaje vyzvaleńnie!
Adkazvajučy na pytańnie pra perspektyvy svajho vyzvaleńnia, Kazulin nazvaŭ datu-aryjentyr metadam ad zvarotnaha: "Viedaju dakładna, što da 25 sakavika mianie nia vypuściać".
Siońnia Kazulin vyhladaŭ filozafam, maralistam, padkreślena abstrahavanym ad realnych kalizijaŭ biełaruskaj palityki. Pabačyć i acanić Kazulina-palityka možna budzie, badaj, tolki paśla taho, jak jon apyniecca na voli.
