Siońnia aktyvisty arhkamietu pa stvareńni Biełaruskaj chryścijanskaj demakratyi Pavał Sieviaryniec i Alaksiej Šein, a taksama juryst pratestanckaj carkvy «Novaje žyćcio» Siarhiej Łukanin pieradali 50 tysiač podpisaŭ u Administracyju prezydenta niezadavolenych Zakonam «Ab svabodzie sumleńnia i relihijnych arhanizacyj». Raniej podpisy byli pieradadzienyja ŭ Kanstytucyjny sud i pałatu pradstaŭnikoŭ.
«Heta represiŭny zakon, jaki ad 2002 hodu pieraškadžaje chryścijanam malicca i pravodzić evanhielizacyju, zajmacca spravaj uratavańnia biełaruskaj nacyi. Pieradajučy hetyja podpisy ŭ dziaržaŭnyja ŭstanovy my patrabujem, kab biełaruskaj carkvie dali ŭratavać nacyju, nie zaminajcie heta rabić. U toj čas, kali chryścijan represujuć pa televizii ŭsiakaja łuchta – astrolahi, pradkazalniki. Pakul chryścijanam nie dazvalajuć rehistravacca biełaruski narod śpivajecca, robiać usio bolš abortaŭ i razvodziacca. My budziem rabić usio, kab źmianić hety zakon. 50 tysiač podpisaŭ – heta dla Biełarusi dosyć mnoha», – kaža Pavał Sieviaryniec.
Alaksiej Šein maje aściarožny spadzieŭ, što ichnyja podpisy buduć razhledžany i pryniatyja da abmierkavańnia:
«Pieramovy ES i ZŠA dajuć nadzieju, što pytańnie ab svabodzie sumleńnia nia budzie zabytaje. Niadaŭna z pałaty pradstaŭnikoŭ nam pryjšoŭ adkaz, dzie było paznačana, što jany, mahčyma, hatovyja ŭklučyć hetaje pytańnie ŭ pracu adnoj z nastupnych sesij. My spynili aktyŭnuju fazu zboru podpisaŭ. Ciapier budzie pravodzicca tłumačalnaja praca z aktyvistami chryścijanskich kanfesij, śviatarami, što rabić, kali jość cisk, jak abaraniać svaje pravy».
