Siońnia, na samym starcie čarhovaj sesii Hieneralnaj asamblei AAN, Buš prajšoŭsia pa Biełarusi. Jana razam z Paŭnočnaj Karejaj, Siryjaj, Mjanmaj dy Iranam zvykła prafihuravała ŭ śpisie režymaŭ, što admaŭlajuć svaim narodam u fundamentalnych pravoch.
Darečy, iranski lider maje mahčymaść dać adłup z toj samaj trybuny ŭžo siońnia. Uvohule jahony vizyt u Ńju-Jork maje pravakacyjna-pijaraŭski charaktar. U pryvatnaści, Machmud Achmadynedžad damahaŭsia mahčymaści naviedać miesca terarystyčnych atak 11 vieraśnia 2001 hodu, ale tudy jaho nie puścili. Niama čaho, maŭlaŭ, kiraŭniku krainy, što spansuje mižnarodny teraryzm, fotkacca na pamiać na miescy trahiedyi. Zatoje musili puścić na dyskusiju ŭ Kalumbijski ŭniversytet. Pry hetym rektar u vočy nazvaŭ hościa "drobnym i žorstkim dyktataram", a pad voknami bušavała akcyja pratestu.
Zrešty, Achmadynedžad nie biantežycca i śviadoma idzie na epataž, naprykład, admaŭlajučy hałakost. Taki samy epatažny styl u Čavesa, da jahoha iranski siabar zavitaje paśla Ńju-Jorku. Zrešty, i Čaves, musić, stamiŭsia vykryvać hlabalnaha hiehiemona, bo na asambleju hetym razam nie palacieŭ. Biełaruski aficyjny kiraŭnik taksama nia staŭ vybiracca na ŭsiaśvietnuju tusoŭku dziaržaŭnych lideraŭ. Nia taja kanjunktura. Zhadziciesia, kali ŭžo lacieć za akijan, dyk nia dziela taho, kab moŭčki prasiedzieć u kutočku. A praktykavacca ŭ filipikach stała niebiaśpiečna.
Kaniešnie ž, spakušaje redkaja mahčymaść atrymać usiaśvietnuju trybunu. Pazaletaś, naprykład, biełaruskaja prapahanda napoŭnicu prapijaryła vizyt Alaksandra Łukašenki na jubilejny samit Abjadnanych Nacyj. Zrešty, i tady daviałosia balansavać. Napoŭnieny eŭfemizmami dy aluzijami vystup pablak na tle zusim užo adviazanaj antyamerykanskaj pramovy Čavesa. Nu a zaraz, kali za śpinoj užo niama kolišniaj apryjornaj rasiejskaj padtrymki i suvoryja realii zmušajuć zadumacca pra dyjaloh z Zachadam, tym bolej nia śled adbirać u pałymianaha Uha palmu pieršynstva ŭ spravie torhańnia tyhra za vusy.
Karaciej, za akijan palacieŭ siońnia ministar Martynaŭ. Budzie prasoŭvać inicyjatyvy što da raznastajnaści šlachoŭ prahresyŭnaha raźvićcia. Majecca na ŭvazie, što my idziem asablivym šlacham, ale tudy, kudy treba. Tak što Zachad chaj nadta nie pierajmajecca:)
