 |
29 žniŭnia ŭ Miensku i inšych haradach Biełarusi adbylisia akcyi pamiaci zahibłych u hady stalinskich represijaŭ. Arhanizataram vystupiŭ Kamitet ŭšanavańnia pamiaci achviaraŭ palityčnych represijaŭ. Akcyja prachodzić 29 dnia štomiesiac z nahody masavaha rasstrełu biełaruskich piśmieńnikaŭ 29 kastryčnika 1937 hodu. Niekalki dziesiatkaŭ čałaviek uskłali kvietki i zapalili śviečki la kryžoŭ va ŭročyščy Kurapaty.
Žałobnaja impreza raspačałasia ŭstupnym słovam daśledčyka historyi stalinskich represijaŭ Ihara Kuźniacova kala kryžoŭ na kurapackim uzhorku. Dalej hutarym z udzielnikam akcyi, siabram arhkamitetu i palitykam Viačasłavam Siŭčykam:
Karespandentka: «Ušanavańnie zahibłych u Kurapatach adbyvajecca vośmy raz, vy tut taksama nie ŭpieršyniu?»
Siŭčyk: «Naturalna. Upieršyniu ja tut byŭ u 1988 hodzie, paśla taho, jak u «LiMie» byŭ nadrukavany artykuł Paźniaka i Šmyhalova «Daroha na Kurapaty» i «Tałaka» pravodziła mitynh».
Karespandentka: «Što mianiajecca z tych časoŭ?»
Siŭčyk: «Dziakujučy namahańniam hramadzkaści, Kurapaty stalisia narodnym memaryjałam».
Karespandentka: «Ciapier my idziom pa alei pamiaci ŭ Kurapatach i za nami iduć ludzi ŭ cyvilnym, jakija doŭha stajali i za ŭsim sačyli. Što vy možacie skazać pra heta?»
Siŭčyk: «Na vialiki žal, heta taksama tradycyjnaja reč. Vieści baraćbu z vandałami i chulihanami siońniašnija ŭłady nie žadajuć. Ale ŭsie akcyi, jakija pravodzić hramadzkaść, adbyvajucca pad pilnym kantrolem specsłužbaŭ».
Karespandentka: «Dziaŭčaty ź bieł‑čyrvona‑biełymi kvietkami, chto vy i čamu siońnia tut, u Kurapatach?»
Dziaŭčyna: «My tut ad «Maładoha frontu», ale ličym, što ŭsie pavinny pamiatać pra hety dzień».
Dziaŭčyna: «Bo tut sapraŭdy byli zabityja biaźvinnyja ludzi. I važna, kab tut było bolej moładzi».
Karespandentka: «Spadarynia Zinaida Tarasievič, vy staršynia Biełaruskaj asacyjacyi achviaraŭ palitčynych represijaŭ. Što vy možacie skazać pra sioniašni dzień?»
Tarasievič: «Oj, siońnia ja prosta ŭražanaja. Kali pryjšło hetulki moładzi, to možna skazać, što nie, Biełaruś nie zahinie. I heta daje nadzieju, što siarod ich, mahčyma, budzie ŭžo taki prezydent, jaki nie praviadzie darohu praz Kurapaty».
Na zaviaršeńnie paminalnaj imprezy prysutnyja zaśpiavali nieaficyjny biełaruski himn «Mahutny Boža».
