Рэжысёр і былы палітвязень Алег Сянцоў, які нарадзіўся ў Крыме, знаходзіцца ў горадзе Часаў Яр, які цяпер з'яўляецца адным з галоўных фарпостаў на Данбасе. Пра гэта Алег Сянцоў паведаміў на сваёй старонцы ў фэйсбуку.
«Трымаем Часік», — напісаў ён.
Раней галоўнакамандуючы Узброеных Сіл Украіны Аляксандр Сырскі паведамляў пра абвастрэнне сітуацыі на полі бою і актыўных нападаў з боку войскаў РФ.
«На Краматорскім кірунку самымі гарачымі кропкамі застаюцца Іванаўскае і Часаў Яр», — адзначыў Сырскі.
Алег Сянцоў быў актыўным удзельнікам Еўрамайдана. Тады быў рэжысёрам з некалькімі прэміямі. Удзельнічаў у Аўтамайдане. Пасля акупацыі Крыма ён часта ездзіў у родны Сімферопаль, дзе спрабаваў арганізаваць мітынгі «за адзіную краіну». Сянцоў быў таксама валанцёрам, перадаваў прадукты і іншыя рэчы першай неабходнасці ўкраінскім вайскоўцам, якія знаходзіліся на паўвостраве, піша «Суспільне».
10 траўня 2014 года расійскія сілавікі затрымалі яго ў Сімферопалі паводле падазрэння ў «падрыхтоўцы дыверсійна-тэрарыстычных актаў у шэрагу гарадоў» Крыма.
Сянцова прысудзілі да 20 гадоў пазбаўлення волі з адбываннем пакарання ў калоніі строгага рэжыму. У верасні 2019 года Украіна вярнула па абмене Алега Сянцова і Аляксандра Кольчанкі.
З першых дзён поўнамаштабнага ўварвання Расіі ў 2022 годзе ён стаў на абарону Украіны. Крымскі рэжысёр служыць у 47-й механізаванай брыгадзе УСУ «Магура». Некалькі разоў быў паранены, але вяртаўся ў строй. У 2023 годзе ў чэрвені ён атрымаў званне малодшага лейтэнанта. Сянцоў стаў аператарам NLAW (найноўшы пераносны супрацьтанкавы ракетны комплекс).
