Фота Pixabay
Многія псіхічныя захворванні, у тым ліку дэпрэсію, усё яшчэ складана дыягнаставаць. У пастаноўцы дыягназу дактары ў асноўным абапіраюцца на скаргі пацыентаў і ацэнку псіхіятраў. Да таго ж, часта ўзнікаюць складанасці з назначэннем медыкаментознага лячэння.
Вынікі новага даследавання навукоўцаў з Медыцынскай школы Індыянскага ўніверсітэта могуць кардынальна змяніць сітуацыю ва ўсім свеце.
Даследчыкі знайшлі ў крыві 26 біямаркераў, з дапамогай якіх можна вызначыць наяўнасць тых ці іншых парушэнняў псіхікі і прызначыць адпаведнае лячэнне. Для гэтага будзе дастаткова ўзяць усяго адзін аналіз крыві.
Вынікі даследавання былі апублікаваныя ў навуковым выданні Molecular Psychiatry.
Спачатку навукоўцы абралі 300 валанцёраў з дэпрэсіяй. Яны апісвалі свой стан, а даследчыкі бралі ў іх аналіз крыві, каб вызначыць сувязь паміж настроем пацыентаў і складам крыві.
Далей навукоўцы скарысталіся базай звестак з 1600 прац, прысвечаных генетыцы, каб выявіць шэраг біямаркераў, звязаных з афектыўнымі разладамі. У выніку навукоўцам удалося скараціць гэты спіс да 26 паказальнікаў, а пасля праверыць іх дакладнасць на другой групе валанцёраў.
Выяўленыя біямаркеры дапамагаюць выявіць цяжкасць дэпрэсіі ў пацыента, рызыку развіцця клінічнай дэпрэсіі ў будучыні, а таксама імавернасць узнікнення біпалярнага разладу.
Такім чынам навукоўцы распрацавалі дакладны інструмент для медыцынскай дыягностыкі і падбору прэпаратаў для лячэння дэпрэсіі. Да таго ж, група даследчыкаў выявіла сувязь афектыўных разладаў з генамі цыркадных рытмаў. (Гэтыя гены рэгулююць сезонныя цыклы арганізма, а таксама цыклы, звязаныя са зменай дня і ночы.) Такім чынам з'явілася магчымасць растлумачыць, чаму сімптомы некаторых пацыентаў горшаюць падчас змены пары года і чаму ў іх узнікаюць парушэнні сну.
