Naš tradycyjny top z najbolš cikavych relizaŭ miesiaca na hety raz całkam składajecca z zornych imionaŭ. Chtości stabilna raduje prychilnikaŭ navinkami, a chtości viarnuŭsia paśla doŭhaha maŭčańnia.
Dapamoh sabrać naš top mabilny dadatak A1 Xplore Music ad Deezer — heta 73 miljony piesień, tysiačy padkastaŭ i aŭdyjaknih, a taksama mahčymaść słuchać muzyku biez raschodu mabilnaha trafiku i afłajn.
Kings of Leon — When You See Yourself
Rok-hurtam, maładość čyich udzielnikaŭ syšła, byvaje vielmi składana adpaviadać čakańniam fanataŭ. Užo fizična niemahčyma davać žaru, jak raniej, a ekśpierymienty nie zaŭsiody kančajucca paśpiachova.
Kings of Leon pryznajucca, što zapisali samy asabisty albom i ŭpieršyniu — biez anivodnaha ŭzrušeńnia. Ale ci stała muzyka horšaj ad taho, što rokiery bolš nie takija, jak raniej?
Śviatasłaŭ Vakarčuk — Oranžierieja
Nazva treciaha solnika lidara hurta «Okiean Jelzi» źjaŭlajecca supraćpastaŭleńniem karancinnamu času, jaki sam Vakarčuk nazyvaje «maralnaj zimoj». Takoje ciopłaje miesca, dzie možna pahrecca i dzie rastuć ekzatyčnyja jarkija raśliny.
Albom zapisany amal usim składam OJE, ale vydadzieny jak solny albom ich lidara. Muzyki heta tłumačać tym, što jany stali zakładnikami stylu svajho hurta i nie mohuć u im ničoha źmianić, tamu dziela ekśpierymientaŭ achviarujuć solnaj karjeraj Śviatasłava Vakarčuka.
KINO — KINO v Sievkabiele
Praz 30 hadoŭ paśla śmierci Viktara Coja jahony hołas znoŭ hučyć na kancertach, a muzykanty aryhinalnaha składu «Kino» dajuć kancerty pad aličbavany hołas ich frantmena.
Praŭda, pandemija pieraškodziła hrandyjoznamu viartańniu na scenu i stadyjonnym kancertam. Kab pakazać, jak hučyć i vyhladaje novaje «Kino», fanaty hurta sabrali bolš za $100 tysiač, i muzyki syhrali kancert, vypuściŭšy jaho jak albom i videa ŭ YouTube.
Lana Del Rey — Chemtrails Over The Country Club
Na žanočaj pop-scenie ciapier prosta fantastyčnaja kankurencyja, i kožny novy albom stanovicca niečym kštałtu abarony čempijonskaha tytułu ŭ svajoj katehoryi.
Miełanchaličnaja Łana Deł Rej paśpiachova ŭ sakaviku zdoleła pierachapić inicyjatyvu ŭ svaje ruki, staŭšy na adnu prystupku z toj ža Tejłar Śvift, a moža, navat i krychu vyšej.
Jay-Jay Johanson — Rorschach Test
Jay-Jay Johanson rychtavaŭsia prezientavać novy reliz ekskluziŭna ŭ ramkach suśvietnaha turne, ale pandemija hetamu nie spryjaje.
Hałoŭnaj krynicaj natchnieńnia šviedskaha muzykanta ŭžo doŭhi čas źjaŭlajecca jahony dziońnik, a ŭ mnohich pieśniach možna adsačyć jaho asabistuju historyju.
UNKLE — Rōnin I
Novy prajekt Džejmsa Łavela ŭjaŭlaje saboj zbornik pieraasensavanych raniejšych chitoŭ razam sa znakamitymi siabrami elektronščyka.
«Ja chacieŭ viarnucca da piesień z alboma «The Road» i stvaryć niekalki kłubnych viersij, jakija adlustroŭvali b biahučy nastroj u bolš aptymistyčnym i radasnym klučy. Bolšaja častka piesień była zapisanaja da COVID-19, u ciažkija, niezrazumiełyja i palityčna niespakojnyja časy. Pandemija tolki zhuściła farby, tak što ja adčuvaju, što pieśni ŭsio jašče darečnyja, i siońniašni dzień daje im druhoje dychańnie», — tak prakamientavaŭ svaju pracu sam Łavel.
El Michels Affair — Yeti Season
Słynny fank-hurt Leona Michielsa pryśviaciŭ novy albom uschodniamu hruvu. Kampazicyi prasiaknutyja ducham vintažnych indyjskich i tureckich filmaŭ, a vokładkaj alboma staŭ płakat da balivudskaha filma 1994 hoda «Cud pryrody».
Muzykanty virtuozna adaptavali amierykanski fank i soŭł da ekzotyki. Atrymaŭsia vydatny ekśpierymient.
Evanescence — The Bitter Truth
Sustrakajcie pieršy za 10 hadoŭ łonhpłej kultavaha kalektyvu, jaki viartaje nam naš 2007 hod.
Emi Li pryznałasia, što pry stvareńni alboma jana natchniałasia ŭ tym liku i Bili Ajliš: jaje zmročny styl i ščyraść padabajucca salistcy Evanescence. U astatnim na novym albomie hurt chacieŭ syhrać «va ŭsiu moc» i dać słuchačam jak maha bolš hitarnych ryfaŭ, pa jakich jany mahli za 10 hadoŭ ssumavacca.
Floating Points, Pharoah Sanders & The London Symphony Orchestra — Promises
Heta toje, što nazyvajuć sučasnaj kłasikaj.
Anhlijski elektronny muzykant Sem Šefiered (Floating Points), lehiendarny saksafanist Feraa Sanders i Łondanski simfaničny arkiestr piać hadoŭ zapisvali 46-chvilinnuju pjesu, dzie jość miesca ŭsiamu: džazu, elektronicy i simfaničnamu maštabu.
Čytać taksama:
Što my słuchali zimoj: 20 najbolš cikavych muzyčnych navinak siezona
