Міністр замежных спраў Беларусі Уладзімір Макей заявіў, што заклікі да эканамічных санкцый, якія гучаць ад апанентаў улады з'яўляюцца вялікай небяспекай для дзяржаўнасці Беларусі, піша Tut.by.
Фота Надзеі Бужан
— Гэтыя заклікі да эканамічных санкцый у маім разуменні не проста вялікае глупства — гэта вялікая небяспека для дзяржаўнасці Беларусі ў цэлым. І калі хто-небудзь думае, што гэта прынясе карысць, то ён глыбока памыляецца. Вядома ж, мы будзем размаўляць з нашымі заходнімі партнёрамі ў гэтым плане. Мне здаецца, там існуе больш разумення адносна таго, ці варта ісці на падобныя меры — на ўвядзенне эканамічных санкцый супраць Беларусі. Але хачу сказаць: калі хто-небудзь хоча пажару ў гэтым рэгіёне, то мы, вядома ж, знойдзем, чым адказаць ініцыятарам падобнага роду крокаў. І вось тады ўжо будзе горача і вакол Беларусі, скажам так, — заявіў Макей у інтэрв'ю тэлеканалу «Беларусь 1», стэнаграма якога апублікавана на сайце МЗС.
Кіраўнік знешнепалітычнага ведамства запэўніў, што сёння абмяркоўваюцца меры ў адказ Беларусі на гэтыя крокі.
— Калі, спадзяюся, што да гэтага не дойдзе, але калі камусьці захочацца распачаць такога кшталту крокі, то ў нас ёсць дастатковы набор сродкаў, які дазволіць нам адэкватна адрэагаваць на магчымыя эканамічныя рэстрыктыўныя меры ў дачыненні да Беларусі.
Гэта і мэтазгоднасць і перспектывы нашага супрацоўніцтва з Еўрапейскай камісіяй і Еўрапейскім саюзам па пытаннях атамнай энергетыкі, па агульнай барацьбе з нелегальнай іміграцыяй, з трансгранічнай злачыннасцю, з кантрабандай наркотыкаў і гэтак далей таму падобнае.
Мы зараз працуем над дакументам у мытнай сферы, дзе маецца таксама шэраг адчувальных пытанняў. Трэба паглядзець на гэта. Паглядзім на шэраг праграм у гуманітарнай сферы, які рэалізуецца тут замежнымі дзяржавамі і няўрадавымі арганізацыямі, і шэраг адукацыйных праграм. У цэлым набор сродкаў і метадаў досыць вялікі, але нам не хацелася б, яшчэ раз падкрэслю, звяртацца да гэтага. Спадзяюся, што здаровы сэнс пераможа, і ні ў каго не з'явіцца жаданне выбудоўваць новыя берлінскія сцены ў дадзенай сітуацыі — - сказаў Макей.
Міністр нагадаў, што на пачатковым этапе апазіцыя і сябры Каардынацыйнай рады казалі пра тое, што выступаюць за ўзмацненне жорсткасці персанальных санкцый, але ні ў якай меры не за эканамічныя санкцыі.
— Да гэтага казалі, што паспрабуюць зрабіць так, каб не было дрэнна народу, звычайнаму чалавеку. Сёння ўжо пра гэты народ і звычайнага чалавека пачынаюць паступова забываць — адзначыў Макей.
Да гэтага часу ў Еўрасаюзе падкрэслівалі, што не хочуць уводзіць эканамічныя санкцыі, каб не нанесці шкоду шараговым беларусам і народнай гаспадарцы краіны. Аднак жорсткасць беларускіх уладаў па адносінах да пратэстоўцаў і гібель Рамана Бандарэнкі заахвоцілі ЕС змяніць свой падыход.
Цяпер абмяркоўваюцца кропкавыя санкцыі супраць канкрэтных беларускіх кампаній, так званых спонсараў дзейнага рэжыму. Еўрапейскім кампаніям і фізічным асобам будзе забаронена мець сувязі з беларускімі фірмамі з «чорнага» спісу. З імі нельга будзе ні гандляваць, ні заключаць здзелкі, ні інвеставаць у іх.