Тэмай чарговай праграмы «Па сутнасці» стала пытанне бяспекі Беларусі. Не абышлося без абмеркавання верагоднасці ўступлення Беларусі ў вайну Расіі супраць Украіны.
Як заўважыў намеснік старшыні пастаяннай камісіі па нацыянальнай бяспецы Палаты прадстаўнікоў генерал-маёр Руслан Касыгін, які ў 2020-2023 гадах узначальваў Галоўнае разведвальнае ўпраўленне Генштаба,
«важна разумець, што нягледзячы на тое, што мы вызначыліся, што Беларусь не павінна ўступіць у вайну, бо для нашай дзяржавы гэта будзе вялізны ўдар, але нас усё роўна спрабуюць уцягнуць у гэту вайну».
Дэпутат генерал-маёр Руслан Касыгін. Скрын відэа CTVBYvideo / YouTube
На погляд Касыгіна, Беларусь у вайну ўцягваюць «заходнія партнёры», якія спрабуюць такім чынам атрымаць яшчэ адзін рычаг, які можна выкарыстаць для ціску на кіраўніка нашай дзяржавы, на ўсё наша кіраўніцтва і на ўсю нашу краіну».
Таму, лічыць дэпутат, «трэба разумець, што мэты і задачы заходніх партнёраў, як любіць паўтараць міністр замежных спраў Расіі Лаўроў, адна — дэстабілізаваць абстаноўку. А гэта зрабіць можна ў тым ліку за кошт уцягнення нас у вайну. Што, зразумела, для нашай дзяржавы недапушчальна».
Далей Касыгін патлумачыў выказаны Лукашэнкам тэзіс аб тым, што Беларусь не збіраецца ваяваць і «Расіі цяпер патрэбная такая Беларусь»: «з боку Украіны на мяжы з Беларуссю размяшчаюцца войскі, якія з'яўляюцца вялізным ваенным патэнцыялам … Гэта сілы тэрытарыяльнай абароны — ваюючыя войскі. І Рэспубліка Беларусь забяспечвае фланг, тыл нашых стратэгічных ваенных саюзнікаў — Расійскай Федэрацыі, стрымліваючы ля нашых межаў групоўку тэрытарыяльных войскаў, якая непасрэдна каля мяжы складае 18 тысяч».
Касыгіна, які і раней выказваўся аб тым, што ЗША і ЕС не хаваюць сваёй падрыхтоўкі да ўзброенага сутыкнення з Беларуссю і Расіяй, дапоўніў палітолаг Пятро Пятроўскі:
«Згодна з тэзісам нашага прэзідэнта, Расія не зацікаўленая ў тым, каб Беларусь удзельнічала ў спецыяльнай ваеннай аперацыі. Цяпер перафразуем: ворагі Расіі зацікаўленыя ўцягнуць Беларусь у баявыя дзеянні».
Чытайце таксама:
«Расіі цяпер патрэбная такая Беларусь». Лукашэнка патлумачыў, чаму беларуская армія пакуль не ваюе
Пятроўскі заклікаў да стварэння мабілізацыйнага тыпу эканомікі Беларусі
Беларускі Генштаб рыхтуецца да вайны з Польшчай. Але абгрунтаваць гэта не можа без канспіралогіі
