Ілюстрацыйны здымак. Фота: «Наша Ніва»
Амерыка або Еўропа?
Еўрапейскі кірунак застаецца найбольш папулярным сярод беларускіх аўтааматараў, але і тэхніка са Штатаў таксама карыстаецца вялікай папулярнасцю. Вызначыцца, што лепей: набыць аўто з Еўропы або ЗША — немагчыма, бо гэта два прынцыпова розныя кірункі, кожны са сваімі перавагамі і недахопамі. Спрэчкі на гэтую тэму сярод аўтааматараў нагадваюць сітуацыю са згушчонкай, калі адны топяць за «Рагачоўскую», а іншыя за «Глыбоцкую».
Еўропа. Не ўсё так проста
На першы погляд, купля аўто ў Еўрасаюзе выглядае куды больш простай задачай, чым у Штатах, але гэта не зусім так. І праблема тут не ў складанасці атрымання візы.
Далёка не кожны прадавец аўто ў Еўрасаюзе гатовы прадаваць аўтамабіль на экспарт у Беларусь. Частка проста не жадае мець дадатковых клопатаў з афармленнем экспарту і вяртаннем ПДВ, а іншыя не могуць гэтага зрабіць, бо іх банк не прымае плацяжы з Беларусі. У тым ліку праз гэта даводзіцца звяртацца па дапамогу да пасярэднікаў.
Кампаній, якія за ўзнагароду дапамогуць набыць аўто ў дылера або з аўкцыёнаў, хапае. За свае паслугі яны бяруць ад 800 да 1500 рублёў. Але арыентавацца варта не на кошт паслугі, а на фінальную суму, у якую абыходзіцца абраны вамі аўтамабіль. Выніковы кошт таго самага аўто, набытага праз пасярэдніка, які ацэньвае свае паслугі ў 800 рублёў, лёгка можа аказацца большым, чым у кампаніі, якая возьме 1500 рублёў.
Ілюстрацыйны здымак. Фота: «Наша Ніва»
Сачыце за лічбамі
Варта звяртаць увагу і на кошт дастаўкі, які агучвае фірма-пасярэднік. Розніца ў цане можа дасягаць некалькі сотняў еўра.
Кожная такая беларуская кампанія мае фірму-партнёра ў Польшчы, Літве або Германіі. Менавіта яны выкупаюць абраны вамі аўто, напрыклад, на нямецкім сайце mobile.de і перапрадаюць яго вам са сваёй камісіяй, але ўжо па цане нета (без ПДВ). Памер камісіі можа даволі моцна адрознівацца, што куды больш паўплывае на канчатковую цану аўто ў Беларусі, чым розніца ў кошце паслуг кампаніі, у якую вы звярнуліся.
Таму перад тым, як заключыць дамову, варта папрасіць кампанію падлічыць прыблізны выніковы кошт аўто з улікам усіх выдаткаў «пад ключ».
Што тычыцца куплі аўто з еўрапейскіх аўкцыёнаў, то схема мала чым адрозніваецца ад пакупкі з mobile.de. Адзінае, што калі ў выпадку з mobile.de часам можна знайсці прадаўца, які прадасць аўто ў Беларусь, то з аўкцыёнам так не атрымаецца.
Ілюстрацыйны здымак. Фота «Наша Ніва»
Удзельнічаць у таргах маюць права толькі еўрапейскія фірмы. Таму набытыя з аўкцыёнаў машыны праходзяць праз фірму-пракладку, якая выкупае іх на аўкцыёне на сваё імя, а пасля перапрадае пакупнікам з Беларусі.
Купля аўто з аўкцыёну мае свае перавагі і недахопы. Плюсы: там прадаюць вельмі шмат аўто ад лізінгавых і страхавых кампаній, якія нельга знайсці ў адкрытым продажы. Апроч таго, гэта добрая магчымасць сэканоміць 5-15% ад кошту аўто ў параўнанні з mobile.de.
Мінусы: машыну вы атрымаеце не так хутка, як пры куплі ў дылера. Ад моманту куплі на аўкцыёне да дастаўкі ў Беларусь праходзіць месяц-паўтара.
Літва
Хоць Літва і з'яўляецца часткай Еўрасаюза, гэтую краіну можна вылучыць асабняком, бо яна даўно з'яўляецца перавалачнай базай для машын з краін Заходняй Еўропы. У адрозненне ад тых жа Германіі, Бельгіі або Нідэрландаў большасць прадаўцоў патрыманых аўто ў Літве з радасцю прададуць машыну на экспарт у Беларусь.
Ілюстрацыйны здымак. Фота: «Наша Ніва»
Таму ў Літве беларусы набываюць аўтамабілі, як самастойна, так і з дапамогай пасярэднікаў. У гэтай балтыйскай краіне перапрадаецца шмат аўто, якія літоўцы оптам выкупаюць у лізінгавых і страхавых кампаній па ўсёй Еўропе.
ЗША — без памагатых не абысціся
Амерыканскі рынак мае сваю спецыфіку. З аднаго боку, там прадстаўлены шэраг мадэляў, якіх няма на еўрапейскім рынку, а з іншага — вельмі мала ўніверсалаў, амаль цалкам адсутнічаюць кампактныя мінівэны. Сярод сучасных аўто амаль не засталося машын з дызельным рухавіком.
Апроч гэтага, калі з Еўропы ў большасці выпадкаў да нас вязуць аўто без пашкоджанняў, то са Штатаў — наадварот. За выключэннем адзінкавых выпадкаў, усе аўто будуць пасля ДТЗ, патопу або іншых пашкоджанняў.
У адрозненне ад Еўропы, набыць самастойна аўто ў ЗША цалкам немагчыма, бо амерыканскія аўкцыёны заблакавалі акаўнты карыстальнікаў з Беларусі і Расіі больш за два гады таму.
Адзіная магчымасць купіць аўто са Штатаў — звяртацца да фірм-пасярэднікаў. За свае паслугі яны бяруць ад 600 да 1200 рублёў, але як і ў выпадку з кампаніямі, якія займаюцца аўтамабілямі з Еўропы, галоўнае — канчатковы кошт усіх выдаткаў, а не толькі тая сума, якую вы заплаціце беларускаму ІП або юрыдычнай асобе.
Іншы вельмі важны момант, які трэба разумець тым, хто хоча набыць аўто са Штатаў — такі варыянт лепш пасуе тым, хто сам цяміць у машынах і зможа цвяроза ацаніць узровень пашкоджанняў.
Ілюстрацыйны здымак. Фота: «Наша Ніва»
Падыдзе не ўсім
Сітуацыі, калі менеджар кампаніі неадэкватна ацэньвае ўзровень пашкоджанняў, праз што сума меркаванага рамонту можа быць нават у некалькі разоў большая, чым на момант папярэдніх разлікаў, не рэдкасць.
Іншы важны момант, да якога трэба быць гатовымі — складанасці з аплатамі з Беларусі ў ЗША. Калі заплаціць за набыты ў Еўрасаюзе аўтамабіль можна наўпрост на рахунак прадаўца або еўрапейскай фірмы-пасярэдніка, то пераводы з Беларусі ў ЗША не ходзяць зусім. Аплаціць наяўнымі, як у некаторых выпадках пры самастойнай куплі ў Еўропе, таксама не атрымаецца.
Разлічыцца з аўкцыёнам напрамую можна толькі калі ў вас ёсць замежны рахунак, напрыклад, у Польшчы. У іншым выпадку давядзецца плаціць праз трэція краіны. Найбольш папулярным на цяперашні момант з'яўляецца разлік праз Казахстан.
Іншы важны момант — тэрмін дастаўкі. Дастаўка машыны са Штатаў займае ад 2 да 3,5 месяцаў. Такім чынам, з улікам часу на рамонт ездзіць на аўто, набытым на замову ў ЗША, вы зможаце не раней чым праз тры месяцы.
Ілюстрацыйны здымак. Фота: «Наша Ніва»
Ці варта столькі чакаць і рызыкаваць?
Тым не менш пры граматным падыходзе ўсе вышэй апісаныя рызыкі акупляюцца, калі параўноўваць кошт аўто на рынку Беларусі з тым, што можа атрымацца пры куплі аўто на замову.
На аўто коштам ад 15-20 тысяч даляраў выгада можа скласці ад $2500 да $4000.
І чым даражэйшы аўтамабіль, тым большая будзе розніца. На аўто коштам 40-60 тысяч даляраў эканомія можа дасягаць і 10 тысяч даляраў.
Апроч гэтага, у Штатах куды прасцей набыць аўто з малым прабегам, чым у Еўропе.
Чытайце таксама:
Не толькі замяніць пакрышкі. Пра што варта паклапаціцца аўтамабілістам з надыходам цяпла
Перагоншчыкі люксавых аўто знайшлі новы маршрут, каб дастаўляць санкцыёнку ў Расію ў абыход Беларусі
