Участак паліцыі ў горадзе Наембяран. Фота: сацсеткі
Гісторыю затрымання беларуса Яраслава Новікава распавёў актывіст Леанід Сасноўскі ў твітары. Ён паведаміў, што Новікаў да апошняга часу жыў у Грузіі — пры гэтым у роднай Беларусі на яго заведзена крымінальная справа за ўхіленне ад абавязковай вайсковай службы.
2 лютага Яраслаў павінен быў пераехаць на час у Арменію. Аднак на армянскім баку яго затрымала прыгранічная служба мясцовай паліцыі — высветлілася, што Мінск абʼявіў мужчыну ў міждзяржаўны крымінальны вышук СНД.
Ананімны прадстаўнік Новікава падзяліўся з «Вось Так», што Яраслаў збіраўся з Грузіі зʼехаць жыць і працаваць у Балгарыю, але не атрымаў у Тбілісі візу. Тады балгарскае прадстаўніцтва параіла маладому чалавеку вярнуцца ў Беларусь і паспрабаваць зноў ужо адтуль. З-за рызык, з якімі мужчына мог сутыкнуцца на радзіме, яму прыйшлося адправіцца ў Арменію, дзе ён планаваў паўторна падацца на візу.
Актывіст Леанід Сасноўскі дапамог затрыманаму знайсці праваабаронцу ў Арменіі — юрыста Хельсінкскай асацыяцыі ў Арменіі Араіка Папікяна. Новікаву далі магчымасць пабачыцца з юрыстам, а таксама патэлефанаваць сваякам. У размове з «Вось Так» адвакат паведаміў, што ўмовы ўтрымання Яраслава нармальныя, «іх там кормяць», але ён купіў затрыманаму дадаткова ежы.
У прымежным пункце паліцыі горада Наембяран на беларуса склалі пратакол і змясцілі ў пастарунак, дзе ён знаходзіцца да гэтага часу. Тэлефон у мужчыны забралі. Ананімны прадстаўнік Новікава ў гутарцы з «Вось Так» паведаміў, што тэрмін затрымання быў працягнуты да 72 гадзін з-за «марудлівасці бюракратычнай машыны».
Беларускі бок адправіў у Арменію заключэнні следчага і пракурора аб узбуджэнні крымінальнай справы на Яраслава, а таксама аб яго вышуку.
Адвакат Папікян распавёў, што 3 лютага па справе Новікава быў прызначаны пракурор, з якім ён ужо паразмаўляў і патлумачыў: затрыманне па заканадаўстве Арменіі «неправамерна». Таму мужчына павінен быць вызвалены. Аднак пракурор адмовіў беларусу ў дасудовым вызваленні.
4 лютага ў 12:00 (паводле Ерэвана) адбудзецца суд над затрыманым, які вырашыць — выконваць патрабаванні Мінска па экстрадыцыі ўхіліста на радзіму ці не. Папікян «амаль упэўнены», што запыт будзе адхілены і малады чалавек выйдзе на волю. У паліцыі, сцвярджае юрыст, Новікаву сказалі, што выпусцяць яго пасля суда.
Чытайце таксама:
У індыйскім аэрапорце згубілі польскі гуманітарны ДНЖ беларускі. Што рабіць у такім выпадку?
