Ілюстрацыйная выява. Фота: «Наша Ніва»
Даследчыя каманды па кібербяспецы з парталаў SecurityDiscovery і Cybernews выявілі гіганцкую ўцечку асабістых даных па ўсёй планеце, якая складае 12 тэрабайт інфармацыі і ахоплівае звыш 26 мільярдаў файлаў асабістых даных (email, нумары тэлефонаў, уліковыя запісы, фатаграфіі і іншае). Большасць з іх з'яўляюцца канфідэнцыйнымі.
Спецыялісты празвалі ўцечку «Маці ўсіх зліваў» і адзначылі, што яна «амаль дакладна» з'яўляецца найбуйнейшай у гісторыі.
Як піша Cybernews, уцечка закранула сотні розных сацсетак і інтэрнэт-рэсурсаў, уключаючы сайты ўрадавых арганізацый многіх краін, такіх як ЗША, Германія, Турцыя, Філіпіны, Бразілія і інш.
«Гэтая ўцечка — надзвычай небяспечная, паколькі злачынцы могуць выкарыстаць выкрадзеную інфармацыю для шырокага спектру нападаў, уключаючы крадзеж асабістых даных, складаныя фішынгавыя схемы, мэтавыя кібератакі і несанкцыянаваны доступ да асабістых і канфідэнцыйных грашовых рахункаў», — папярэдзілі даследчыкі, падкрэсліўшы, што ўзломшчыкі пакуль не ідэнтыфікаваныя.
Спіс самых пацярпелых ад гіганцкай уцечкі сэрвісаў і сацсетак па колькасці страчаных файлаў асабістых даных. Фота: Cybernews
Найбольш пацярпелай ад уцечкі, паводле Cybernews, з'яўляецца буйная кітайская сацсетка Tencent QQ, якая страціла паўтара мільярда файлаў асабістых даных карыстальнікаў.
У тым ліку пад удар трапілі такія інтэрнэт-рэсурсы, як:
- Weibo (504 млн. файлаў);
- MySpace (360 млн. файлаў);
- Twitter (281 млн. файлаў);
- Deezer (258 млн. файлаў);
- Linkedin (251 млн. файлаў);
- AdultFriendFinder (220 млн. файлаў);
- Adobe (153 млн. файлаў);
- Canva (143 млн. файлаў);
- «УКантакце» (101 млн. файлаў);
- Daily Motion (86 млн. файлаў);
- Dropbox (69 млн. файлаў);
- Telegram (41 млн. файлаў);
Акрамя таго, хакерская атака закранула і тры беларускія дамены. Гэта sundays.by (сайт беларускага пастаўшчыка тавараў для побыту і адпачынку), obana.by (ужо няісны сайт аўкцыёну тавараў са Скандынавіі) і tuts.by (такога сайту таксама не існуе, аднак даследчыкі маглі памыліцца і дадаць лішнюю літару да назвы разгромленага сілавікамі буйнога партала Tut.by, чый новы ўладальнік дагэтуль невядомы).
Поўны спіс пацярпелых інтэрнэт-рэсурсаў можна знайсці ў канцы артыкула Cybernews.
Чытайце таксама:
Лукашысты збіраюцца змагацца з VPN і ананімайзерамі
Як дэананімізуюць уладальнікаў крыптакашалькоў і што зрабіць, каб засцерагчыся?
Асцярожна, адбываюцца масавыя спробы ўзлому тэлеграм-акаўнтаў беларусаў. Расказваем, як абараніцца
