Юрый Чабатар. Фота: economy.gov.by
Працаваў з расійскімі інвестарамі
Юрый Чабатар выконваў абавязкі міністра эканомікі з лістапада 2023 года, калі яго папярэднік Аляксандр Чарвякоў быў адпраўлены Лукашэнкам паслом у Кітай.
Юрый Чабатар віншуе калегаў з Новым годам. Фота: economy.gov.by
У ведамстве Чабатар адказваў за імпартазамяшчэнне, а таксама працаваў з расійскімі інвестарамі. У сваіх інтэрв'ю ён казаў пра «індывідуальны падыход у працы з расійскімі рэгіёнамі».
«Мы разлічваем, што рэалізацыя сумесных праектаў у рамках праграмы «Беларусь — Расія» дасць магчымасць узмацніць інтэграцыю нашых рэгіёнаў, развіваць і ўмацоўваць іх вытворчы, лагістычны, дэмаграфічны і сацыяльны патэнцыялы», — казаў ён летась у чэрвені.
У лістападзе на беларускім інвестыцыйным форуме ў Маскве чыноўнік даводзіў, што «сёння інвестклімат краіны гатовы мяняцца пад запыты расійскіх партнёраў».
У Міністэрстве эканомікі — 21 год
Юрый Чабатар нарадзіўся ў Мінску ў 1979 годзе. Вучыўся ў Серабранцы ў школе № 123.
Ён выпускнік улікова-эканамічнага факультэта Беларускага дзяржаўнага эканамічнага ўніверсітэта (2002 год).
Як і большасць чыноўнікаў, якія імкнуцца зрабіць у цяперашняй дзяржаўнай сістэме кар’еру, мае дыплом Акадэміі кіравання (2008).
З міністэрствам эканомікі Чабатар звязаны з 2002 года. Ён пачынаў малодшым навуковым супрацоўнікам навукова-даследчага эканамічнага інстытута Міністэрства эканомікі. Пасля працаваў у розных аддзелах ведамства. У 2016-м стаў намеснікам міністра.
Юрый Чабатар з Раманам Галоўчанкам. Фота: economy.gov.by
У разгар перадвыбарчай кампаніі 2020 года ён перасеў у крэсла першага намесніка міністра эканомікі.
У 2015 годзе Юрый Чабатар быў узнагароджаны медалём «За ўклад у стварэнне Еўразійскага эканамічнага саюза». А ў 2023-м прэм’ер Раман Галоўчанка ўручыў яму медаль «За працоўныя заслугі».
Удзельнічаў у апытаннях пра Украіну ў «Аднакласніках»
Юрый Чабатар з 2011 года мае акаўнт у сацыяльнай сетцы «Аднакласнікі». Яна поўніцца пераважна віншаваннямі. На застаўцы фота з вясёлым чыноўнікам на нечым вяселлі.
Юрый Чабатар адпачывае. Фота: сацыяльныя сеткі
У 2012 годзе ён пахваліўся фотаздымкам з савецкім ГАЗам і пракаментаваў яго «Вперед! На целину».
Пасля поўнамаштабнага ўварвання Расіі ва Украіну Чабатар прагаласаваў у апытанні, прымеркаваным да прызнання Пуціным незалежнасці «ДНР» і «ЛНР». Пытанне было, ці сочыце вы за падзеямі ва Украіне. Як адказаў чыноўнік, не бачна.
Удзел Юрыя Чабатара ў апытанні аб вайне ва Украіне. Фота: скрын з сацыяльнай сеткі
Жонка прадавец
Паводле звестак са старонкі чыноўніка ў сацыяльнай сетцы, яго жонка Кацярына Чабатар, у дзявоцтве Бода, працавала прадаўцом на Мінскім аўтамабільным заводзе. Яна выпускніца Мінскага гандлёвага каледжа.
Кацярына таксама рабіла прадаўцом у Старых Дарогах, піша «Радыё Свабода» на падставе звестак ад «Белпол».
Сям’я жыве ў мікрараёне Каменная Горка ў Мінску, гадуе дваіх дзяцей-школьнікаў.
Бацька — інжынер, маці — філолаг з Інстытута мовазнаўства
Як даведалася «Радыё Свабода», бацька чыноўніка Адам Чабатар працаваў вядучым інжынерам-канструктарам на ААТ «КБТЭМ-ОМА». Прадпрыемства займаецца распрацоўкай спецыяльнага оптыка-механічнага, тэхналагічнага і кантрольна-вымяральнага абсталявання.
Маці Юрыя Чабатара Надзея Андрэеўна працавала ў Інстытуце мовазнаўства НАН. Яна сумесна з Ганнай Арашонкавай склала «Тлумачальны слоўнік адметнай лексікі ў творах Якуба Коласа». Таксама ў яе шмат іншых публікацый, прысвечаных розным аспектам мовы Якуба Коласа.
Па прызначэнні на міністэрскую пасаду Чабатар заявіў, што эканоміка адаптуецца да цяперашніх выклікаў і складанасцяў, дзякуючы рашэнням Лукашэнкі і ўраду.
Паводле новапрызначанага міністра, у перыяд электаральнай кампаніі 2024 года Міністэрства эканомікі павінна гучаць, выходзіць з ініцыятывамі.
«Наша Нiва» — крыніца якаснай інфармацыі і бастыён беларушчыны
ПАДТРЫМАЦЬ «НН»Глядзіце таксама:
Ніводзін беларускі рэгіён не выканаў мэтавых паказчыкаў — Галоўчанка
Галоўчанка заключыў пагадненне аб гуманітарнай дапамозе Данбасу
Міністэрства эканомікі: Беларусь можа страціць 20 млрд даляраў у выніку санкцый ЕС
Што Беларусі выгадней эканамічна — імкнуцца ў ЕС або заставацца ў саюзе з Расіяй?
