Інфаграфіка паветраных нападаў Texty.org.ua на тэрыторыі Украіны з 6 верасня па 3 лістапада
Павялічаны фрагмент інфаграфікі з накладзенай картай Беларусі
Звесткі для складання інфаграфікі журналісты ўзялі ва ўкраінскага маніторынгавага канала Monitor, які спецыялізуецца на фіксацыі траекторыі руху расійскай авіяцыі, дронаў і ракет.
«Флагшток» звярнуўся да спецыялістаў маніторынгавага канала з просьбай расказаць пра абставіны атакі з тэрыторыі Беларусі:
«На карце можа некарэктна адлюстроўвацца маршрут эксперыментальных расійскіх беспілотнікаў з лёгкіх матэрыялаў, фанеры і рухавікоў, г.зн. не шахедаў. Яны прайшлі па мяжы Беларусі каля 00:00 — 02:00 у ноч з 24.10 на 25.10. Запускі БПЛА з тэрыторыі Беларусі за перыяд назірання не зафіксаваныя».
Гэтая інфармацыя ўзгадняецца з дадзенымі сэрвіса, які фіксуе аб'явы паветраных трывог Map air alerts: над Кіеўскай і Жытомірскай абласцямі Украіны ў ноч з 24 на 25 лістапада была абвешчаная працяглая паветраная трывога. Над Кіеўскай вобласцю трывога была абвешчаная ў 23:59, завяршылася ў Жытомірскай у 04:47.
Час паветраных трывог у Кіеўскай і Жытомірскай абласцях (час адпавядае беларускаму)
Час фіксацыі расійскага БПЛА ў памежжы супаў з днём, калі жыхары палескіх райцэнтраў Гомельскай вобласці зафіксавалі гук моцных выбухаў. Гэта адбылося ўначы 25 кастрычніка ў 4:04. Жыхары Мазыра пачулі гучныя выбухі. Шум быў такой сілы, што многія адчулі вібрацыю сцен і пачулі бразгатанне шкла, забрахалі спалоханыя сабакі, спрацавалі сігналізацыі аўтамабіляў. Людзі, якія чулі выбух, апісваюць яго як «жудасны». Некаторыя людзі змаглі пачуць два ці тры асобныя выбухі. Пра гэта мазырчукі масава дзяліліся ў сацыяльных сетках 25 кастрычніка.
Акрамя жыхароў Мазыра, у гэты ж час гук выбуху пачулі жыхары суседніх вёсак. Шум выбухаў быў зафіксаваны таксама ў Нараўлянскім, Ельскім раёнах.
Аранжавым колерам пазначаныя месцы, дзе былі чутныя выбухі
Жыхар Мазыра, які зафіксаваў выбух, знаходзячыся на вуліцы, на ўмовах ананімнасці паведаміў «Флагштоку» пра эпіцэнтр выбуху:
«Крыніца гуку знаходзілася дзесьці за НПЗ, гэта значыць у кірунку Нароўлі».
Іншая крыніца паведаміла, што шум паходзіў з раёна вёскі Вялікі Бокаў, дзе з пачатку поўнамаштабнага ўварвання ва Украіну размешчаныя ракетныя комплексы супрацьпаветранай абароны:
«Было два пускі з Бокава».
Дзейныя ўлады палічылі за найлепшае не заўважаць выбухаў.
На пытанне пра выбухі па дзяжурным тэлефоне МНС «Флагштоку» тады адказалі: «Я не магу адказаць на гэтае пытанне, усё ў нас спакойна. Гэта могуць быць… можа хуліганы забаўляліся, нешта гучна стукнула. У нас усё спакойна, усё добра, хвалявацца няма пра што».
Ананімны міліцэйскі паблік, які спецыялізуецца на асвятленні рэпрэсій на Палессі, 26 кастрычніка даў заведама нерэалістычную версію:
«З 23.10 да 27.10.2023 у Корасценьскім радовішчы гранітаў ва Украіне праводзяцца запланаваныя падрыўныя працы. Так-так, вось так усё проста, нашы суседзі ўсяго толькі займаюцца сваёй прамысловасцю».
Міліцыянтаў не збянтэжыла значная аддаленасць гэтага горада (125 кіламетраў ад Мазыра), а таксама той факт, што выбуховыя работы па начах не праводзяць.
Такім чынам, можна зрабіць выснову, што з-за расійскага беспілотніка, які пралятаў у памежжы ў 4:04 ночы 25 кастрычніка, адбылося баявое прымяненне ракетных комплексаў супрацьпаветранай абароны, размешчаных у Мазырскім раёне.
Мяркуючы з таго, што беспілотнік працягнуў рух з памежжа ў кірунку Хмяльніцкай вобласці Украіны, падбіць расійскі дрон тады не ўдалося.
Чытайце таксама:
«Якія, бл…дзь, шэрыя схемы?!» Як беларусы ганяюць у Расію люксавыя еўрапейскія аўто ў абыход санкцый
