Кадр з фільма «Радзіма»
Колькі людзей глядзелі фільмы фэсту?
Другі год запар кінафэст дэманстраваў большую частку сваёй праграмы online бясплатна. Каб паглядзець фільмы, на платформе зарэгістравалася 2989 новых гледачоў. А агульная колькасць карыстальнікаў платформы кінафэсту склала 4774!
Агулам сёлета на платформе кінафэсту зафіксавалі 18 435 праглядаў фільмаў і івэнтаў «Ззяння». Гэтая лічба ў два разы перавышае паказчыкі мінулага года.
Хто перамог у Міжнародным конкурсе дэбютаў «Паўночнага ззяння — 2023»?
Міжнароднае журы, у складзе якога літоўскі рэжысёр Вітаўтас Пуйдокас, беларуская рэжысёрка Ганна Саўчанка і шведскі рэжысёр Віктар Нордэншэльд, — аглядала фільмы з Міжнароднага конкурсу дэбютаў. Яны выбралі пераможцам у конкурсе дэбютаў дакументальную карціну «Апалонія, Апалонія» рэжысёркі Леа Глоб.
«Шчырае даследаванне падарожжаў мастачкі Апалоніі і самой рэжысёркі. Нягледзячы на зусім розныя жыццёвыя выклікі, жанчыны знаходзяць паразуменне ў сваім імкненні перадаць рэчаіснасць праз выявы. Фільм выходзіць за рамкі тыповага партрэта мастака — сведчанне глыбокага ўплыву, які можа аказаць здымка чужой гісторыі на рэжысёра, моцнай сувязі паміж аповедам і асабістай трансфармацыяй», — каментуюць свой выбар у журы.
Журы таксама адзначыла спецыяльнымі згадкамі два фільмы: «Апошняя вясна» Францішкі Эліасен і «Горы» Крысціяна Айнсхоя.
Які фільм перамог у Беларускім конкурсе «Паўночнае ззянне — 2023»?
На працягу кінафестывалю фільмы Беларускага конкурсу аглядала асобнае міжнароднае журы, у складзе якога ўкраінская прадзюсарка Дар’я Басэль, беларускі рэжысёр Аляксей Палуян і дырэктар Еўрапейскага кінарынку Дэніс Рух. Яны прысудзілі Гран-пры Беларускага конкурсу фільму «Радзіма» рэжысёраў Аляксандра Міхалковіча і Ганны Бадзякі.
«Нягледзячы на тое, што аповед не выклікае аптымізму, само існаванне гэтага таленавітага фільма, які ўбачылі гледачы па ўсім свеце, дае надзею на тое, што заганнае кола траўм і санкцыянаванага дзяржавай гвалту ўрэшце будзе разарванае са з'яўленнем новага пакалення вызваленых беларусаў», — абгрунтавала свой выбар журы.
Спецыяльным прызам узнагароджаны фільм Андрэя Кашперскага «Ператрымка».
Таксама журы адзначыла спецыяльнай згадкай карціну Максіма Буйніцкага «Дзённік Анастасіі».
Упершыню на «Паўночным ззянні» фільмы-пераможцы Беларускага конкурсу атрымаюць грашовыя прызы. Прызавая падтрымка дадзена тэлеканалам «Настоящее время» і складае 1200$ для фільма, які заваяваў гран-пры, і 800$ стужцы, якой сябры журы прысудзілі спецыяльны прыз.
З якіх краін часцей за ўсё беларусы глядзелі фільмы фэсту?
Сёлета больш за ўсё людзей глядзелі фестывальныя стужкі «Ззяння» на тэрыторыі Беларусі. У топ краін таксама ўвайшлі Польшча, Літва, Германія, Грузія, Францыя.
Які самы папулярны фільм?
Самым папулярным фільмам па колькасці праглядаў на платформе кінафэсту стаў «КУЛ (Навіны з Беларусі)», які складаецца з навэлаў розных рэжысёраў, заснаваных на беларускіх навінах. Яго глядзелі 1154 разоў.
