Фота: vecteezy
Дзіцячыя педыятры ў Еўропе ўстрывожаныя выявамі на дзіцячых таварах, якія могуць патэнцыйна нашкодзіць малым. У даследаванні, апублікаваным у The Journal of Pediatrics, было выяўлена, што амаль 80% упаковак тавараў для дзяцей з выявай спячага немаўля паказваюць позы для сну, небяспечныя для дзіцяці і выразна вызначаныя ў якасці асноўнага фактару рызыкі развіцця сіндрому раптоўнай дзіцячай смерці (СРДС).
СРДС — гэта нечаканая і невытлумачальная смерць дзіцяці ва ўзросце да 1 года. Напрыклад, у ЗША штогод адбываецца каля 1400 смерцяў з-за СРДС (па даных на 2020 год), паведамляе The Conversation.
У рамках новага праекта, які аб’яднаў даследчыкаў з розных еўрапейскіх навучальных устаноў і даследніцкіх структур, былі вывучаныя выявы, паказаныя на ўпакоўках дзіцячых падгузнікаў у 11 еўрапейскіх краінах, уключаючы Францыю, Германію, Італію і Іспанію. Агулам было даследавана больш за 600 розных упаковак дзіцячых падгузнікаў.
На 49% упаковак быў здымак са спячым дзіцём, аднак 79% з іх не адпавядалі хаця б адной рэкамендацыі па прафілактыцы СРДС. Напрыклад, дзіця выяўлялася ў становішчы на баку, на жываце, з мяккімі прадметамі або свабоднай пасцельнай бялізнай (падушкамі, падобнымі да падушак цацкамі, мяккімі цацкамі, коўдрамі, аўчынамі, неадпаведнымі прасцінамі або бамперамі для дзіцячых ложкаў). На некаторых упакоўках паказвалася, як немаўля спіць разам з іншым дарослым чалавекам на сумесным спальным месцы. Такім чынам, вельмі вялікая доля здымкаў не адпавядае рэкамендацыям па бяспечным сне немаўлят.
Прыклады ўпакоўкі падгузнікаў з выявамі, што не адпавядаюць рэкамендацыям па прафілактыцы СРДС:
— дзіця спіць не на спіне (А, С);
— сон дзіцяці са свабоднай пасцельнай бялізнай або мяккім прадметам (падушкай, вялізнай коўдрай, цацкай) (A, B, C, D);
— дзіця дзеліць спальнае месца з іншым чалавекам (D).
Выява: Martin Chalumeau/Inserm
Рэкамендацыі па прафілактыцы, заснаваныя на навуковых даных
Існуюць канкрэтныя рэкамендацыі па прадухіленні сіндрому раптоўнай дзіцячай смерці, апублікаваныя Амерыканскай акадэміяй педыятрыі. Яны вядомыя з 1990-х гадоў і былі абноўленыя ў кастрычніку 2016 года.
- Укладвайце немаўлят для сну на спіну ў іх уласным спальным месцы без іншых людзей.
- У якасці спальнага месца выкарыстоўвайце ложачак для немаўлят, калыску, люльку або так званы партатыўны дзіцячы дворык з цвёрдым плоскім матрацам і прасціной па памеры. Трэба пазбягаць сну на канапе або крэсле, ці ў любых прыладах для сядзення: напрыклад, на арэлях або аўтамабільным сядзенні (за выключэннем паездкі ў машыне).
- Трымайце свабодныя коўдры, падушкі, мяккія цацкі, бамперы і іншыя мяккія прадметы, якія тэарэтычна могуць перакрыць паветра, далей ад месца для сну.
- Па магчымасці карміце грудзьмі і пазбягайце палення.
Рэклама можа стварыць ілюзорнае адчуванне праўдзівасці
У паводзіннай і медычнай літаратуры добра вядома, што выявы могуць уплываць на спажывецкія звычкі. Рэкламныя выявы гістарычна з’яўляюцца адначасова як важным інструментам для пераканання спажыўца, так і крыніцай інфармацыі. Калі рэклама перадае несапраўдную інфармацыю, напрыклад, малюнак дзіцяці ў небяспечнай для сну позе, гэта ўяўляе дзве важныя праблемы з пункта гледжання таго, як бацькі апрацоўваюць гэтую інфармацыю.
Па-першае, спажыўцы звычайна лічаць, што рэкламныя выявы створаныя спецыялістамі, і таму лічаць іх аўтарытэтнымі крыніцамі. У выніку бацькі, верагодна, прымуць паказаную інфармацыю без крытычнай ацэнкі яе сапраўднасці.
Другая праблема можа быць яшчэ больш згубнай. Хоць бацькі могуць ведаць рэкамендацыі па бяспечным сне, якія ім маюць паведамляць у тым ліку ў радзільні або падчас візіту да педыятра — на жаль, шматразовае ўздзеянне адной і той жа няправільнай інфармацыі можа стварыць ілюзію праўды. Нават калі людзі ведаюць, што інфармацыя няправільная, яны могуць паверыць, што яна «не такая ўжо і няправільная». Такім чынам, ведаючы, што немаўлятам рэкамендуецца спаць менавіта на спіне, бацькі могуць у выніку паверыць, што спаць на жываце для немаўляці таксама нармальна.
Марцін Шалюмо, адзін з суаўтараў даследавання, робіць выснову: «Нам неабходна скараціць уздзеянне камерцыйных або афіцыйных малюнкаў, якія не адпавядаюць рэкамендацыям па прафілактыцы СРДС, каб прадухіліць небяспечныя практыкі сну. Робячы гэта, вытворцы і заканадаўцы ў поўнай меры паспрыяюць атрыманню дакладнай інфармацыі пра здароўе».
Чытайце таксама:
Чаму «пазітыўнае выхаванне» павінна ўключаць у сябе таксама і пакаранне
