Рада Бяспекі ААН. Фота: Wikimedia Commons
Паводле звестак ААН, пасяджэнне Рады Бяспекі ААН па сітуацыі на Блізкім Усходзе будзе закрытым і пачнецца ў 22.00 па мінскім часе ў нядзелю, 8 кастрычніка. Пра гэта паведамляе CNN.
Тым часам колькасць загінулых у Ізраілі перавысіла 600 чалавек. Больш за сотню грамадзян Ізраіля знаходзяцца ў закладніках у радыкальнай групоўкі ХАМАС пасля суботніх атак баевікоў, паведаміў урад Ізраіля. Авіяцыя гэтай краіны ўжо нанесла ўдары па сотнях аб'ектаў баевікоў, а на поўначы магчымая эвакуацыя.
Нагадаем, у пятніцу, 6 кастрычніка, споўнілася 50 гадоў з пачатку «вайны Суднага дня», а 7 кастрычніка баевікі пачалі аперацыю «Бура Аль-Аксы» — выпусцілі па Ізраілі некалькі тысяч ракет і прарваліся на тэрыторыю краіны. ХАМАС вінаваціць ізраільскі бок у акупацыі і «апаганьванні свяшчэннага месца мусульман», а таксама ў неаднаразовых уварваннях у мячэць Аль-Акса на Храмавай гары ў Іерусаліме.
Наступствы ракетнай атакі на Ізраіль. Фота: тэлеграм-канал IsraelInRussia
Лідар ваеннага крыла руху ХАМАС Мухамед Дэф заявіў, што па віне Ізраіля загінулі і атрымалі раненні сотні палесцінцаў, а таксама сотні з іх знаходзяцца ў ізраільскіх турмах. Таксама, паводле яго слоў, Ізраіль адмовіўся ад перамоў па іх абмене.
Ізраільскі ўрад фактычна абвясціў пра стан вайны — задзейнічаў параграф «40-Алеф». Такім чынам, армія атрымала поўную свабоду дзеянняў. У мінулы раз гэты параграф уводзілі ў дзеянне 50 гадоў таму, падчас вайны Суднага дня.
