«Расіянін з беларускай душой» спявае пра любоў да Беларусі з Вікторыяй Алешка 5

Фота з сацыяльных сетак Івана Дзятлава і Вікторыі Алешка. Калаж: «Наша Ніва»

Апошнія дні песню актыўна прэзентуюць падчас ранішніх перадач. Словы і музыку напісала маладая аўтарка Алена Шандабыла. Дарэчы, у сацыяльных сетках дзяўчыны пазначаная, што яна — «сонграйтар для Стаса Міхайлава, Мікалая Баскава, Жанет, І. Дзятлава ды інш.».

На розных эфірах Алешка дзякуе Богу за моладзь, якая, маўляў, так тонка і глыбока адчувае патрыятызм і вельмі любіць радзіму.

Фота з інстаграма аўтаркі слоў і музыкі песні «Неба Беларусі» Алены Шандабыла

Нескладана здагадацца, які меседж у песні «Неба Беларусі» — яна пабудаваная на аснове міфу аб мірным небе над Беларуссю, за якое прапагандысты ўсхваляюць Лукашэнку.

Скрыншот сторыз у інстаграме Івана Дзятлава

— На ідэалагічную тэму заўсёды вельмі складана спяваць, як у вас атрымліваецца захоўваць лёгкасць, і ў той жа час не страціць сэнс? — пацікавілася вядучая «Добрай раніцы, Беларусь!» у Вікторыі Алешка.

— Заўсёды лёгка нешта рабіць, калі шчыра і ад душы. Я ўпэўненая, што Ваня, нягледзячы на тое, што ён з Расіі…

— Я — расіянін з беларускай душой, — перабіў партнёрку Дзятлаў. — Ёсць у песні радок, які я пяю і ўсярэдзіне нешта адгукаецца. Гэта «У сэрцы ёкае мілы куточак».

Таксама ён расказаў, што даўно сочыць за творчасцю Вікторыі, а сёлета пазнаёміўся з ёй на «Славянскім базары», дзе яны абое былі ў складзе журы дзіцячага конкурсу. Іван прапанаваў заспяваць дуэтам. Цалкам магчыма, што Алешка як вопытная ўдзельніца канцэртаў «За Беларусь» хутка прыдумала, якую кампазіцыю будзе лёгка прадаць дзяржаве.

Іван Дзятлаў і Вікторыя Алешка. Скрыншот відэа тэлеканала «Беларусь 1»

Выглядае, што Іван Дзятлаў — адзін з тых артыстаў, хто зразумеў, што зараз найбольш просты шлях да поспеху ідзе праз патрыятызм. Не мае значэння, наколькі ты таленавіты: калі ты спяваеш патрыятычна, цябе буду запрашаць на ўсе праўладныя канцэрты. А гэта стабільнае паступленне ганарараў.

Нягледзячы на тое, што ў афіцыйнай біяграфіі спевака падкрэсліваецца, якіх поспехаў ён дасягнуў у Расіі (напрыклад, ён выступаў на сцэнах Крамлёўскага палаца і канцэртнай залы «Расія»), здаецца, у Беларусі яго кар’ера ўсё ж складаецца больш паспяхова.

У 2019 годзе Іван заняў трэцяе месца на «Славянскім базары». А ў 2023 перамог у другім сезоне музычнага праекту «Фактар.by». Спявак стаў нярэдкім госцем на беларускім тэлебачанні.

Скрыншот відэа «Нашай раніцы» на АНТ

— Я спадзяюся, што Іван застаецца ў нас надоўга, а не толькі на гэтае свята, — сказаў вядоўца «Нашай раніцы» на АНТ.

— «Так точно!» — па-вайсковаму адрэагаваў спявак.

Ён таксама дадаў, што гісторыя яго сям'і цесна звязана з Беларуссю. Дзед, паводле яго слоў, служыў у Брэсцкай крэпасці, бацька вучыўся ў Мінску ў Вайсковай акадэміі. Іван жартуе, што ўсіх мужчын у ягонай сям'і цягне да Беларусі.

Здаецца, попыт на «беларускую душу» расіяніна сапраўды ёсць. Дзятлаў і Алешка кажуць, што спадзяюцца выканаць «Неба Беларусі» некалькі разоў у Дзень народнага адзінства на розных пляцоўках.

Чытайце таксама:

«Ах, Аляксандр, любая з ім пойдзе ў агонь і ваду». Маладая спявачка прысвяціла песню Лукашэнку

Усе свае на чале з нявесткай Лукашэнкі. У Беларусі назвалі найлепшую песню 2022 года

Ад 500 да 10 тысяч даляраў. Колькі пойдзе на ганарары для артыстаў на Дзень горада? 

Колькі грошай выдаткавалі на канцэрт пасля праўладнага аўтапрабегу з удзелам Эйсмант і Баскава

Ганна Стафановіч

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ