Фота Святланы Малышка
Да абласных «Дажынак» Ганцавічы добраўпарадкоўваюць. Горад мяняецца на вачах, хоць працы яшчэ нямала. Але разам з прыемнымі пераменамі многія жыхары горада незадаволеныя тым, што на яго вуліцах выразаюць дрэвы.
Разлапісты клён каля «Дома гандлю» быў своеасаблівай візітоўкай плошчы.
Цэнтр Ганцавічаў да «Дажынак» Так выглядаў клён да таго, як над ім папрацавалі бензапілой. Фота Сяргея Багрова
Клён на плошчы зрэзалі пад корань. Фота Святланы Малышка
А потым і пень выкарчавалі, а плошча аблысела. Фота Сяргея Багрова
Жыхары горада паспелі звярнуць увагу, што ўвогуле дрэў у горадзе прыкметна паменела. Так, зрэзалі сасну каля царквы, цэлы шэраг велізарных дрэў насупраць ПМС, каля прыпынку ў бок аграгарадка Хатынічы. Каля аптэкі ў мікрараёне пад зубцамі бензапілы не выстаялі бярозы.
Прыбралі «лішнія» дрэвы і каля дома па вул. Чайкоўскага, 8, і насупраць крамы «Хвілінка» па вул. Кастрычніцкай.
Выразалі некалькі дрэў па вул. Кастрычніцкай. Фота Святланы Малышка
Парадзела каля рэстарана «Цна», некалькі дрэў зніклі насупраць крамы «Дзіцячы свет».
Алея пісьменства таксама пазбавілася некалькіх дрэў. Фота Святланы Малышка
Каля шматпавярховіка на вуліцы Заслонава не стала бяроз і кустоў бэзу… Дабраліся і да алеі клёнаў каля хлебазавода.
Думкі жыхароў адносна гэтага падзяліліся. Адныя лічаць, што ўлады выразаюць аварыйныя дрэвы, іншыя абураюцца і сумняюцца, што замест выразаных пасадзяць новыя.
Запытаны рэдакцыяй «Ганцавіцкага часу» кіраўнік Ганцавіцкай раённай інспекцыі прыродных рэсурсаў і аховы навакольнага асяроддзя Мікалай Міхалевіч адказаў, што дрэвы выразаюць не з іх падачы.
«Пытанне не да мяне, у архітэктуру звярніцеся…», — сказаў чыноўнік.
Карэспандэнтка ўдакладніла, ці не інспекцыя павінна кантраляваць выразанне дрэў у населеных пунктах, і хто на гэта дае дазвол?
Мікалай Міхалевіч сказаў, што ўсе работы вядуцца па праектах, якія маюцца на кожны аб'ект, і кантралюе іх выкананне аддзел архітэктуры.
«Усё робіцца згодна з праектам. І ў кожным праекце ёсць таксацыйны план. Нам справаздачы дасылаюць. Аплату ЖКГ дасылае, кампенсацыйныя выплаты. Пасадкі будзем кантраляваць згодна з праектам у спрыяльны перыяд часу», — растлумачыў ён.
У той жа час кіраўнік аддзела архітэктуры, будаўніцтва і жыллёва-камунальнай гаспадаркі Ганцавіцкага райвыканкама Валерый Русакевіч быў настроены агрэсіўна. Нават не выслухаўшы пытанне карэспандэнта, ён адмовіўся адказваць на пытанні і кінуў слухаўку.
«Ганцавіцкі час» цытуе ўвесь дыялог:
«Кар.: Валерый Мікалаевіч? Святлана Малышка, «Ганцавіцкі час» вас турбуе.
Валерый Русакевіч: Дык «Ганцавіцкага часу» ўжо ж няма.
Кар.: Ёсць інтэрнэт-рэсурс.
Валерый Русакевіч: Ну дык то інтэрнэт-рэсурс… Я ў інтэрнэт ніякіх тлумачэнняў не даю.
Кар.: Добра, у інтэрнэт вы не даяцё, але на падставе артыкула 34 Канстытуцыі Беларусі… (суразмоўца перабівае)
Валерый Русакевіч: Я нікому нічога не даю! Чытайце «Савецкае Палессе» і «Зарю». І глядзіце Мы#Ганцевичи. Усе. Да пабачэння. (павесіў слухаўку).
Пасля цягам паўгадзіны карэспандэнтка зноў спрабавала датэлефанавацца да Валерыя Русакевіча і спытаць, чаму ён кідае слухаўку. Бо яна не толькі карэспандэнтка, але ж яшчэ і грамадзянка Беларусі, жыхарка Ганцавіч. І яе цікавіць пытанне: хто і навошта вырашыў зразаць здаровыя дрэвы ў горадзе? Але дарэмна — трубку ніхто не браў.
Чытайце таксама:
У Ганцавічах фарбуюць туі. Новы арт-аб'ект да «Дажынак»?
гэта русакевіча няма. як чалавека