Іна Зайцава гатовая паспрачацца з тым, хто лічыць, што жанчыны мала зрабілі падчас пратэстаў 2020 года. Скрын з відэа
Іна Зайцава заўважае, што ў яе вельмі дрэннае стаўленне да тых, хто лічыць, што жаночыя акцыі падчас пратэстаў нічога не далі.
«У мяне вельмі дрэннае стаўленне да людзей, якія нешта маюць супраць кветак і беларускіх жанчын. Асабліва гэта тычыцца людзей, якія яшчэ да 2014 года з'ехалі ва Украіну, са зброяй у руках змагаліся супраць другіх узброеных людзей смела і дзёрзка. Гэта не змяншае іх смеласці і дзёрзкасці.
Але я хачу сказаць, што быць з аўтаматам у руках супраць другога ўзброенага чалавека дае іншае адчуванне ўласнай безабароннасці, чым у сітуацыі, калі ты ў нейкай сукенцы на беларускім мірным маршы. І я яшчэ моцна паспрачаюся, дзе больш трэба мужнасці», — сцвярджае жанчына.
Іна абурылася тым, што з боку такіх мужчын ідзе крытыка Святланы Ціханоўскай за тое, што яна нешта не так зрабіла ці сказала. «Якія вы крутыя са зброяй у руках супраць іншых узброеных людзей. Там усё сумленна: хто мацнейшы», — кажа яна.
Іна з іроніяй адзначае, што сіла беларускіх жанчын — у беларускіх мужчынах: «У нас шмат дастаткова інфантыльных мужчын. І гэта не папрок. Гэта абумоўлена вялікімі стратамі ў час Другой сусветнай вайны. Калі было шмат мужчын страчана. Маці, якія выхоўвалі сваіх сыноў (а гэта рабілі ў асноўным жанчыны), вельмі іх бераглі. І гэта дайшло ў такім скажоным выглядзе.
Мы, выходзячы на пратэсты ў белых сукенках, былі б не супраць, каб ноччу выходзілі беларускія мужчыны. Мы былі не супраць. Проста мы рабілі сваю частку. Мы рабілі сваю частку пратэсту. А мужчыны беларускія сваёй часткі неяк не зрабілі. Магчыма, таму, што ўсе былі занятыя ва Украіне ў 2014-м годзе. Не даехалі. Не склалася. А цяпер апавядаюць, вось каб яны… Я гатовая паспрачацца з усякімі барадатымі, вусатымі з таго боку таксама».
Іна адзначыла, што для яе прыкладам моцнай беларускай жанчыны зʼяўляюцца Марыя Калеснікава і Святлана Ціханоўская.
«Вялізная павага Ціханоўскай. Тое, што яна робіць, крытыкуецца. Я проста ўяўляю ўзровень стрэсу, які яна перажыла. І нагадаю, што яе муж таксама сядзіць у турме. Яна з усіх бакоў была ўвесь гэты час акружаная рызыкай. Усё, што яна робіць, аддаючы гады свайго жыцця нам, беларусам… Ёй вялікая павага і маё захапленне. Дзякуй», — падкрэслівае Іна Зайцава.
Глядзіце цалкам:
