Сумесная трэніроўка вагнераўцаў і Сіл спецыяльных аперацый на палігоне «Брэсцкі». Фота: Мінабароны Беларусі
Злучаныя Штаты не займаюцца нарошчваннем сваіх войскаў ва Усходняй Еўропе ў сувязі з перакідкай сіл расійскай прыватнай вайсковай кампаніі (ПВК) «Вагнер» у Беларусь. Пра гэта паведаміла ў чацвер на рэгулярным брыфінгу для журналістаў намесніца прэс-сакратара Пентагона Сабрына Сінгх, піша ТАСС.
«Няма ніякай інфармацыі пра перамяшчэнне войскаў або змену дыспазіцыі нашых войскаў на ўсходнім флангу [NATO]», — заявіла афіцыйная прадстаўніца Міністэрства абароны ЗША, каментуючы пачатак супольнага навучання Узброеных сіл Беларусі з атрадамі ПВК «Вагнер».
Як абвясціла раней прэс-служба Мінабароны Беларусі, сілы спецыяльных аперацый сумесна з байцамі ПВК «Вагнер» адпрацуюць некалькі вучэбна-баявых задач на палігоне «Брэсцкі».
Раней у Мінабароны Беларусі паведамлялі, што байцы «Вагнера» ўдзельнічаюць у падрыхтоўцы вайскоўцаў тэрытарыяльных войскаў Беларусі ў раёне Асіповічаў. Мінск не ўдакладняе колькаснага складу байцоў ПВК «Вагнер», якія прыбылі ў Беларусь.
Тым часам у Беларусь ужо прыбылі дзевяць калонаў ПВК, а Яўген Прыгожын нават запісаў з Беларусі відэа.
У самім ПВК «Вагнер» зазначаюць, што ў Беларусь можа прыбыць да дзесяці тысяч байцоў.
Чытайце таксама:
Прыгожын у сваёй першай прамове ў Беларусі заклікаў «не крыўдзіць беларускіх дзяўчат»
У Беларусь прыбылі яшчэ дзве калоны вагнераўцаў — «Беларускі Гаюн»
Што вядома пра «Піянера», які будзе кіраваць ПВК «Вагнер» у Беларусі
