Адзін з асноўных камандзіраў «вагнераўцаў» Антон Елізараў з пазыўным «Лотас» (злева) і кіраўнік ПВК «Вагнер» Яўген Прыгожын (справа). Фота: прэс-служба Прыгожына
Адзін з сяброў рады камандзіраў ПВК «Вагнер» Антон Елізараў з пазыўным «Лотас» расказаў аднаму з расійскіх ваенкараў пра будучыя планы наймітаў, у прыватнасці па размяшчэнні ў Беларусі. Яго словы перадаў расійскі праваенны тэлеграм-канал «Сіняя Z Барада».
Па словах Елізарава, Прыгожын цяпер распусціў усіх «вагнераўцаў» у адпачынак да пачатку жніўня. Зроблена гэта было для магчымасці адпачыць перад вялікай працай, асноўную частку якой трэба будзе рабіць у Беларусі».
Сам Елізараў пры гэтым не паведаміў, ці знаходзіцца ў гэты момант у Беларусі хаця б частка наймітаў.
«У найбліжэйшай перспектыве нам трэба правесці ратацыю хлопцаў на далёкіх напрамках і прыняць навабранцаў. Потым самае складанае — гэта выхад у Беларусь. Нам трэба будзе правесці падрыхтоўку баз і палігонаў, правесці ўзгадненне з іх органамі ўлады, арганізаваць супрацоўніцтва з беларускімі сілавікамі, а таксама наладзіць лагістыку.
А пакуль мы ўсе ў адпачынку да пачатку жніўня. Распараджэнне Яўгена Віктаравіча», — расказаў «вагнераўскі» камандзір Антон Елізараў.
Нагадаем, што пасля мяцяжу расійскія ўлады прапанавалі Яўгену Прыгожыну і ПВК «Вагнер» перадыслакавацца ў Беларусь.
Пры гэтым, паводле слоў Аляксандра Лукашэнкі, сам Прыгожын і яго найміты, нягледзячы на дамоўленасці, усё яшчэ знаходзяцца ў Расіі.
Чытайце таксама:
Нямецкая разведка праслухоўвала Прыгожына і Лукашэнку падчас бунту ў Расіі — медыя
