Святлана Ціханоўская ў Рыме сустрэлася з міністрам замежных спраў Італіі Антоніа Таяні. Фота: Офіс Ціханоўскай
Падчас сустрэчы палітыкі абмяркоўвалі размяшчэнне ядзернай зброі ў Беларусі, а таксама сітуацыю з палітвязнямі, як паведамляе прэс-служба Ціханоўскай.
Ціханоўская распавяла Антоніа Таяні, што беларускіх палітвязняў трымаюць у ізаляцыі, і міжнародны ціск неабходны, каб дабіцца іх вызвалення. Палітыкі гаварылі пра дапамогу грамадзянскай супольнасці і незалежным медыя.
Міністр замежных спраў Італіі запэўніў Святлану Ціханоўскую ў падтрымцы Італіяй дэмакратычных сіл і грамадзянскай супольнасці Беларусі.
Італія не будзе накіроўваць у Мінск пасла, а зменшыць дыпламатычную прысутнасць да ўзроўню паверанага, як раней паабяцала зрабіць Нямеччына, паведамляе прэс-служба Ціханоўскай.
Антоніа Таяні паабяцаў падняць пытанне новых санкцый Еўрасаюза супраць рэжыму Лукашэнкі, а таксама пытанне закрыцця шчылін у санкцыйным рэжыме.
Італія выказала гатоўнасць падтрымаць расследаванне фактаў дэпартацыі ўкраінскіх дзяцей у Беларусь і саўдзелу рэжыму Лукашэнкі ў гэтым.
«Італія працягне выдаваць візы беларусам, таму што Італія адрознівае рэжым і беларусаў. Таксама Італія працягне выдаваць стыпендыі беларускім студэнтам і прымаць дзяцей з рэпрэсаваных сем’яў на аздараўленне», — дадае прэс-служба Ціханоўскай.
Акрамя таго, Святлана Ціханоўская папрасіла Італію аказаць дапамогу беларускім добраахвотнікам ва Украіне, а таксама падтрымаць беларускія культурныя ініцыятывы, якія ўмацоўваюць беларускую ідэнтычнасць.
Ціханоўская прапанавала перадаць на падтрымку палітвязняў замарожаныя актывы (Італія на гэтым тыдні замарозіла актывы звязаных з беларускім і расійскім рэжымамі людзей на два мільярды).
Лідарка беларускай апазіцыі звярнула ўвагу, што група «Вагнер» прызнаная многімі краінамі ў свеце крымінальнай і тэрарыстычнай групоўкай, і прапанавала прызнаць рэжым Лукашэнкі спонсарам тэрарызму.
Святлана Ціханоўская знаходзіцца ў Рыме з 5 ліпеня па запрашэнні міністра замежных спраў і парламента Італіі.