Протаіерэй Андрэй Лемяшонак. Кадр з відэа
Протаіерэй Андрэй Лемяшонак заявіў, што казаў няправільныя пропаведзі ў 2020 годзе.
«Мы ў царкве спрабуем сысці ад палітыкі. Я мітрапаліту пра гэта казаў, што калі пачаліся хваляванні 2020 года, я некалькі разоў казаў няправільныя пропаведзі. Мне Бог адкрыў, што я казаў няправільныя рэчы, палітычныя рэчы. Мне было балюча ад гэтага. Больш я не рабіў так ніколі», — сказаў святар на сваёй чарговай духоўнай сустрэчы «Аўторак з бацюшкам» з прыхаджанамі, заўважыў тэлеграм-канал «Хрысціянская візія».
У 2020-м айцец Лемяшонак выступіў за Лукашэнку, ён, напрыклад, сцвярджаў, што мірныя мітынгоўцы былі настолькі ўзброеныя, што было шмат ахвяр сярод сілавікоў ад іх нападаў.
У лістападзе протаіерэй, адказваючы на пытанне верніцы пра падзеі ў краіне, прачытаў цэлую лекцыю пра шкоду рэвалюцый. Паводле яго меркавання, амапаўцаў трэба пашкадаваць, а маці збітага імі хлопца павінна пакаяцца, бо «дрэнна выхавала сына».
Зрэшты «Хрысціянская візія» раіць не цешыць сябе ілюзіямі.
«Але не варта цешыць сябе і сягоння. Хоць ён прызнаўся, што Бог яму забараніў казаць пра палітыку, прама на гэтай жа сустрэчы ён працягнуў гэта рабіць з няменшай стараннасцю. Ён заявіў, што «моцныя гэтага свету» спецыяльна вынайшлі кавід-пандэмію, каб знішчыць праваслаўе. Цяпер з той жа мэтай яны арганізавалі вайну ва Украіне. Ён спакойна разважае, што раней думаў, што Пуцін прадаў Данбас, калі не абараняе яго. А вось цяпер робіць тое, што трэба», — зазначае тэлеграм-канал.
Чытайце таксама:
Протаіерэй Лемяшонак: Маці збітага АМАПам хлопца трэба пакаяцца, бо «дрэнна выхавала сына»
Святар Лемяшонак расказаў, чаму ён моліцца за расійскае войска
Протаіерэй Лемяшонак пахваліў Лукашэнку за падтрымку Расіі ў вайне і не толькі
