Пачаўся Будслаўскі фэст — ён праходзіць сёлета на адкрытым паветры

Вялікі пажар знішчыў дах Будслаўскага касцёла 11 мая сёлета. Фота Надзеі Бужан.

Паколькі пасля пажару будслаўская базыліка знаходзіцца ў аварыйным стане, у сувязі з чым уваход у будынак і набліжэнне для яго забаронены, усе малітвы і цэлебрацыі будуць адбывацца на палявым алтары на адкрытым паветры, паведамляе Сatholic.by.

Тут жа будзе знаходзіцца цудадзейны абраз Маці Божай Будслаўскай для ўшанавання вернікамі.

Праграма фэсту:

2 ліпеня, пятніца

18.00 — святая Імша для пілігрымаў; цэлебрацыю ўзначальвае арцыбіскуп Тадэвуш Кандрусевіч
20.00 — жывы Місійны Ружанец
23.30 — працэсія са свечкамі і копіяй абраза Маці Божай Будслаўскай

3 ліпеня, субота

0.00 — святая Імша ў інтэнцыі адбудовы Будслаўскай святыні. Узначальвае цэлебрацыю Старшыня Канферэнцыі Каталіцкіх Біскупаў у Беларусі біскуп Віцебскі Алег Буткевіч
8.45 — Фацімскі Ружанец; праводзіць «Легіён Марыі»
10.00 — святая Імша; цэлебрацыю ўзначальвае Апостальскі нунцый у Рэспубліцы Беларусь арцыбіскуп Антэ Ёзіч
на заканчэнне святой Імшы — Эўхарыстычная працэсія

Паркоўкі для аўтатранспарту будуць на полі з боку Даўгінава і на старым аэрадроме з боку Крывічоў. Намётавы гарадок для пілігрымаў будзе арганізаваны ў вёсцы Палессе.

Арганізатары звяртаюцца да ўдзельнікаў з вялікай просьбай падчас усіх набажэнстваў і мерапрыемстваў захоўваць належныя санітарныя прадпісанні і сацыяльную дыстанцыю, а таксама строга выконваць патрабаванні адносна правядзення масавых мерапрыемстваў і набажэнстваў. Падчас споведзі выкарыстанне медыцынскай маскі абавязкова.

Вялікі пажар знішчыў дах Будслаўскага касцёла 11 мая сёлета. У першы дзень пасля пажару быў адкрыты збор сродкаў на аднаўленне касцёла. На 10 чэрвеня сабрана 734 896 руб. Збор працягваецца.