Румынскі чацвёрты арбітр Себасцьян Колцэску назваў аднаго з трэнераў стамбульцаў П'ера Вэбо «чорным». Пасля гэтага да рэферы падбег форвард «Істанбула» Дэмба Ба і бурна выказаў нязгоду. У выніку галоўны суддзя Авідыу Хацган паказаў трэнеру чырвоную картку за спрэчкі, піша «Спорт-Экспресс».
«Істанбул» у поўным складзе адправіўся ў распранальню. Неўзабаве ў тым жа кірунку прайшлі і гульцы ПСЖ. Дэлегат матчу спрабаваў угаварыць футбалістаў вярнуцца на поле, але перамовы доўга ні да чаго не прыводзілі.
Адразу ж у твітары «Істанбула» з'явіўся запіс: «Не расізму». Клуб падтрымалі іншыя стамбульскія клубы.
Неўзабаве з'явілася расшыфроўка перамоваў брыгады арбітраў. «Чорны хлопец там, на лаўцы. Ідзі правер, хто ён. Той чорны, так нельга сябе паводзіць», — сказаў Колцэску галоўнаму арбітру.
Расшыфравалі і зваротны пасыл Ба. Калі коратка, то ён казаў наступнае: «Ты ж не кажаш «гэты белы хлопец», ты кажаш проста «гэты хлопец».
Заступіўся за Вэбо і форвард ПСЖ Кіліян Мбапэ.
Праз дзве гадзіны пасля пачатку матчу прэс-служба УЕФА пракаментавала інцыдэнт у сустрэчы ў Парыжы: «Ва УЕФА ведаюць аб тым, што адбылося ў сённяшняй гульні. Мы правядзём падрабязнае расследаванне. Расізму і дыскрымінацыі ва ўсіх яе формах няма месца ў футболе».
Французскія журналісты Telefoot змаглі ўзяць каментар у самога Калцэску, праз якога разгарэўся канфлікт: «Negru» па-румынску азначае «чорны», я не расіст», — сказаў арбітр.
Паводле французскіх СМІ, матч скончаць у сераду з новай брыгадай арбітраў. Сустрэчу прадоўжаць з 13-й хвіліны, пачатак — у 20:55. Але турнірнага значэння гульня не мае, ПСЖ гарантаваў сабе месца ў 1/8 фіналу, а «Істанбул» не мае шанцаў нават на Лігу Еўропы.
