35-гадовы мінчук Аляксей Іваноў памёр яшчэ 19 красавіка, але сваякі паведамілі пра гэта прэсе толькі нядаўна. Яны кажуць, што хранічных захворванняў мужчына не меў. А прычынай смерці стала менавіта «карона».
«Наша Ніва» звязалася з Аленай, удавой Аляксея.
«Усё пачыналася як звычайная прастуда: у мужа балела горла, павысілася тэмпература… Пасля захварэла і я, і бацькі мужа (мы жывём разам). У выніку нас чацвярых шпіталізавалі — ва ўсіх была пнеўманія.
Зрабілі тэсты на каранавірус — ва ўсіх станоўчыя, — распавяла жанчына. — Дзе мы маглі заразіцца, не ведаю. Меры бяспекі выконвалі заўсёды, калі на вуліцу, то толькі ў масках і пальчатках. Муж працаваў з дома, таксама нікуды не хадзіў».
У бальніцы Аляксею трохі палепшала, але пасля рэзка стала горш. Праз 10 дзён пасля шпіталізацыі ён памёр.
«У пасведчанні аб смерці так і напісалі — «COVID-19», — кажа Алена. — Бо муж быў абсалютна здаровы, ніякіх хранічных захворванняў не меў».
Сама Алена і бацька Аляксея паціху паправіліся. Толькі свякроў правяла ў бальніцы амаль месяц — на днях жанчыну выпісваюць.
«Прэтэнзій да дактароў я не маю, яны рабілі, што маглі», — кажа Алена.
Адметна, што падчас падрыхтоўкі матэрыялу карэспандэнт «Нашай Нівы» гаварыў з суседзямі. У тым самым пад'ездзе некалькі чалавек паведамілі, што сядзяць дома з прастудамі.
«Не, гэта не «карона»… Але не заходзьце да нас, мы на самаізаляцыі», — кажуць людзі.