Фота з афіцыйнага сайта ДНР
Прэм'ер-міністрам непрызнанай Данецкай народнай рэспублікі (ДНР) стаў былы віцэ-губернатар Іркуцкай вобласці Уладзімір Пашкоў, піша lenta.ru.
Інфармацыя пра тое, што Пашкоў выконвае абавязкі кіраўніка ўрада, з'явілася на сайце кіраўніка ДНР Дзяніса Пушыліна 5 лютага. Раней гэтую пасаду займаў Аляксандр Ананчанка. Афіцыйных заяў аб перастаноўках ва ўладзе непрызнанай рэспублікі не было.
Прэс-сакратар прэзідэнта Расіі Дзмітрый Пяскоў, каментуючы магчымае прызначэнне Пашкова, сказаў журналістам, што гаворка не ідзе пра «афіцыйнае дэлегаванне афіцыйнай асобы». Ён падкрэсліў, што Расія абсалютна не датычная да канфлікту на паўднёвым усходзе Украіны.
Расійскі грамадзянін Пашкоў нарадзіўся ў Брацку, быў віцэ-мэрам горада ў 2005 годзе, да 2014-а працаваў намеснікам губернатара Іркуцкай вобласці. Пасля сыходу з дзяржслужбы ён заснаваў шэраг кампаній і ўзначаліў прадпрыемства «Знешгандальсэрвіс» збеглага ўкраінскага алігарха Сяргея Курчанкі. У сакавіку 2017 года кампанія атрымала кантроль над нацыяналізаванымі заводамі ў ДНР і ЛНР. Служба бяспекі Украіны сцвярджала, што праз дабрачынны фонд Пашкова Расія фінансавала бюджэт ЛНР, спрабуючы пазбегнуць новых эканамічных санкцый.
