Зборная Расіі па футболе не зможа выступіць на чэмпіянаце свету 2022 года пад нацыянальным сцягам, калі прайграе разгляд у Спартыўным арбітражным судзе (CAS) па пытанні санкцый, накладзеных выканкамам Сусветнага антыдопінгавага агенцтва (WADA), піша РБК.
У сераду арабскі тэлеканал beIN Sports паведаміў, што WADA інфармавала Расію пра забарону выступаць на сусветным першынстве ў Катары, якое пройдзе з 21 лістапада па 18 снежня 2022 года. У прэс-службе Расійскага футбольнага саюза адзначылі, што ніякіх паведамленняў не атрымлівалі. У Міжнароднай федэрацыі футбола інфармацыю аб адхіленні расійскай зборнай ад удзелу ў чэмпіянаце свету не пацвердзілі.
У прэс-службе WADA паведамілі, што рашэннем выканкама арганізацыі ад 9 снежня мінулага года было пацверджана, што чэмпіянат свету па футболе 2022 года ўваходзіць у пералік спаборніцтваў, на якіх расійскія спартсмены змогуць выступаць толькі ў нейтральным статусе — без сцяга і гімна. «Калі CAS пацвердзіў прапанаваныя меры», — удакладнілі ў WADA.
9 снежня 2019 года выканаўчы камітэт WADA прыняў рашэнне адхіліць расійскіх атлетаў ад удзелу ў буйных спаборніцтвах на чатыры гады пад сцягам краіны. На той жа тэрмін Расія страціла права прымаць буйныя міжнародныя турніры з-за пазбаўлення статусу Расійскага антыдопінгавага агенцтва (РУСАДА).
Расійскі бок аспрэчыў рашэнне і цяпер чакае судовага разгляду ў CAS.
