Затым, калі гаспадары зніклага ката і сабакі звяртаюцца ў ЖКГ, іх адпраўляюць у Мінск, каб забіраць назад свайго гадаванца.
Для чаго так робіцца, «Наша Ніва» запыталася ў намесніка начальніка Валожынскай ЖКГ Паўла Клемянкова:
«Такая працэдура. Мы не маем права адлоўліваць жывёл, бо ў Валожыне няма пунктаў часовага ўтрымання жывёл. А забіваць жывёл мы не хочам, ды і не маем на гэта права. Усе ж хочуць жыць. Таму мы заключылі дамову з «Фаўнай горада», яны прыязджаюць і забіраюць жывёл. Мінск — гэта найбліжэйшы да нас горад, дзе ёсць такая паслуга. Калі гаспадар жывёлы знаходзіцца, мы накіроўваем яго ў Мінск. Так, чалавек вымушаны сам забіраць свайго ката ці сабаку. Калі хочаце, гэта такое пакаранне, што выпускае сваю жывёлу без нагляду», — адказаў Павел Клемянкоў.
Выклік «Фаўны горада» каштуе 76,65 рубля. Столькі плацяць арганізацыі за гадзіну працы спецыялістаў. Плюс транспартныя расходы. На сайце «Фаўны горада» паведамляецца, што адзін кіламетр каштуе 1,22.
Значыць, дарога да Валожына і назад каштуе мясцоваму ЖКГ прыкладна 200 рублёў.
Дырэктарка «Фаўны горада» Тамара Царыкоўская растлумачыла «Нашай Ніве», што ў асноўным «Фаўна горада» працуе ў Мінску і Мінскім раёне:
«Калі арганізацыя гатовая аплаціць транспартныя паслугі, мы будзем працаваць дзе заўгодна. Валожын, бадай, гэта самы аддалены пункт на сённяшні дзень. У кожным раённым горадзе пры ЖКГ ёсць службы адлову жывёл. Пытанне толькі ў тым, што не ўсе маюць магчымасць утрымліваць жывёл або развозіць іх па тых гарадах, дзе існуюць пункты часовага ўтрымання. Таму часцей за ўсё жывёлаў утылізуюць на месцах», — патлумачыла Тамара Царыкоўская.
