У апошнія дні мінулага года ў Мінску з'явіўся аўтобусны прыпынак «вуліца Мазурава», аформлены ў гонар дэсантнікаў. Але пільныя назіральнікі ўжо знайшлі гістарычную нестыкоўку фактаў і верагодны плагіят, піша Радыё Свабода
Выкананнем і аздабленнем прыпыначнага пункту займаецца прадпрыемства «Рэмаўтадар» Фрунзенскага раёна Мінска. Там патлумачылі, што ў перспектыве на суседнім полі мяркуецца абсталяваць парк спецыяльнай ратавальнай і вайсковай тэхнікай, у тым ліку авіяцыйнай — адпаведная пляцоўка ўжо падрыхтаваная. А таму, кажуць у «Рэмаўтадары», тэматычны элемент будзе акурат да месца.
Павільён трымаецца на мэталічных каркасах і накрыты блакітным празрыстым арганічным шклом. Наверсе — фігура вайскова-транспартнага самалёту Іл-76 з чырвонымі зоркамі на крылах і хвасце.
Унутры канструкцыі прымацавалі таблічку з цытатай генэрала арміі, аднаго з родапачынальнікаў паветрана-дэсантных войскаў у СССР Васіля Маргелава. Аднак фон надпісу зусім не адпавядае ні беларускай, ні нават савецкай рэальнасці.
Пільныя карыстальнікі сеціва заўважылі, што аўтары прыпынка-помніка не пагрэбавалі плагіятам. Выявілася, што ў якасці фону для малюнку выкарыстаныя амэрыканскія верталёты «Х'юі» UH-1 Iroquois і выявы вайскоўцаў арміі ЗША, узброеных карабінамі М1.
Выява з фону, імаверна, была ўпершыню размешчаная на сайце Freepic.com. Беларускія дызайнеры дамалявалі толькі стандартныя дэсантныя парашуты. Арыгінал размешчаны пад уласнай ліцэнзіяй сайту, што дазваляе вольнае выкарыстанне і мадыфікацыю выявы для асабістых і камерцыйных мэтаў, але з абавязковым пазначэннем аўтарства. На плакаце з прыпынку не відаць пазнакі аўтарства.
9 студзеня ля павільёна з'явіліся будаўнікі з лескамі-страмянкай. Яны расказалі, што будуць «удасканальваць» самалёт, каб той быў, «як на карцінках» — трэба дамаляваць ілюмінатары ды колерам адцяніць элементы фюзеляжу.
Таксама сказалі, што на нейкі час здымуць плакат з цытатай генерала Маргелава. Праўда, не таму, што візуальны шэраг не адпавядае гістарычнай праўдзе, а таму што «заляпаны».
