Намеснік кіраўніка МУС Кыргызстана дамовіўся з прадстаўнікамі экс-прэзідэнта Алмазбека Атамбаева адпусціць раніцай спецназаўцаў, узятых у закладнікі яго прыхільнікамі, паведамляюць інфармагенцтвы.
Некалькі спецназаўцаў, якія штурмавалі рэзідэнцыю Атамбаева, апынуліся ў закладніках.
Атамбаеў заклікаў сілавікоў «не страляць у свой народ»
У сераду ўвечары спецслужбы Кыргызстана пачалі аперацыю па затрыманні Атамбаева у яго рэзідэнцыі ў сяле Кой-Таш за 20 кіламетраў ад сталіцы. Яго прыхільнікі перашкодзілі гэтаму. У выніку 43 чалавекі атрымалі раненні, адзін спецназавец загінуў. Затрымаць экс-прэзідэнта не ўдалося.
Прыхільнікі экс-прэзідэнта Атамбаева адбілі штурм кыргызскага спецназа ВІДЭА
Парламент Кыргызстана 20 чэрвеня перадаў у пракуратуру пералік абвінавачванняў у адрас Атамбаева, падрыхтаваны спецыяльнай дэпутацкай камісіяй. Былы прэзідэнт можа быць датычны да карупцыі пры мадэрнізацыі ЦЭЦ Бішкека, вызвалення па падробленых медыцынскіх лістках лідара злачыннай групоўкі, незаконнага пераводу зямель і іншых незаконных дзеянняў. Атамбаеву можа пагражаць пажыццёвы тэрмін.
Атамбаеў назваў абвінавачванні парламентарыяў «абсурднымі», заявіў, што чысты перад народам і гатовы адказаць за ўсе свае ўчынкі на пасадзе прэзідэнта.
Алмазбек Атамбаеў узначальваў краіну з 2011 па 2017 год. Ён з'яўляецца адзіным усенародна абраным прэзідэнтам краіны, які добраахвотна перадаў уладу.
