Карэспандэнт «НН» звязаўся з намесніцай старшыні Слонімскага райвыканкама Тарэсай Юшкевіч. Рускамоўнае графіці да Дня беларускага пісьменства — сфера яе адказнасці.
Тарэса Юшкевіч. фота «Газеты Слонімскай»
У пачатку верасня ў Слоніме пройдзе Дзень беларускага пісьменства. Да гэтага свята ў цэнтры горада намалявалі велізарнае графіці — тэатр Міхала Казіміра Агінскага. Надпіс на ім зрабілі па-руску, але людзі абурыліся: Дзень беларускага пісьменства, дык прычым тут руская мова?
Новы віцэ-мэр Слоніма пакіне скандальнае графіці па-руску: «Дзеля захавання нацыянальна-моўнай згоды ў грамадстве»
«Па-першае, гэта графіці рыхтавалася не да Дня пісьменства, а ў межах добраўпарадкавання горада», — пачала Юшкевіч.
Чыноўніца патлумачыла, што пытанне выклікала спрэчкі сярод гараджан: разам са зваротамі ў выканкам аб тым, каб змяніць надпіс на беларускую мову, прыйшло шмат пісьмовых зваротаў аб тым, каб пакінуць усе як ёсць.
«Людзі пералічвалі розныя факты на карысць таго, каб пакінуць графіці па-руску, адзін з іх: у нас двухмоўе, таму такі надпіс можа быць. Мы правялі апытанку ў сацсетках. Большасць слонімцаў выказаліся за рускую мову.
Пісьмовыя звароты ў нас захоўваюцца ў аддзеле ідэалогіі. Іх можна пабачыць.
Графіці ж па-беларуску з'явіцца на будынку нашага цэнтра культуры», — адказала Тарэса Юшкевіч.
***
Тэрэса Юшкевіч нарадзілася ў вёсцы Харужава Ваўкавыскага раёна. Скончыла Брэсцкі дзяржаўны педагагічны інстытут. Працавала настаўніцай пачатковых класаў у слонімскай школе №6, пасля намеснікам дырэктара школы па вучэбнай рабоце. У 1995 годзе пераведзена метадыстам у аддзел адукацыі райвыканкама. Тут жа працавала галоўным спецыялістам. З 2012 года ўзначаліла ўпраўленне адукацыі Слонімскага райвыканкама і з'яўлялася яго кіраўніком да сёлетняга прызначэння.
