Галоўнакамандуючы ядзернымі сіламі ЗША заявіў у суботу, што ён адмовіцца ад загаду прэзідэнта Дональда Трампа нанесці ядзерны ўдар, калі гэты загад будзе «незаконным», паведамляе CNN.
Галоўнакамандуючы ядзернымі сіламі ЗША генерал Джон Хайтэн.
Выступаючы на Форуме міжнароднай бяспекі ў Галіфаксе, Канада, генерал Джон Хайтэн, які кіруе стратэгічным камандаваннем ЗША, падзяліўся тым, што адбудзецца, калі яму загадаюць пачаць ядзерны ўдар.
«Я кансультую прэзідэнта, — сказаў Хайтэн. «Ён скажа мне, што рабіць, і калі гэта незаконна, адгадайце, што адбудзецца? Я скажу: «Спадар Прэзідэнт, гэта незаконна». Адгадайце, што ён зробіць ён? - Ён скажа: «А што будзе законным?» І мы прыдумаем варыянты спалучэння магчымасцяў, каб адрэагаваць на любую сітуацыю. Вось так гэта і працуе. Гэта не так складана».
Стратэгічнае камандаванне ЗША кантралюе ядзерную зброю ЗША і супрацьракетную абарону. Дэмакраты ў Кангрэсе і Сенаце занепакоеныя тым, што Трамп занадта «нестабільны», каб яму давяралі ядзерную зброю.
Хайтэн выступіў з тлумачэннямі пасля таго, як сенацкі камітэт па замежных справах заслухаў на гэтым тыдні даклад аб паўнамоцтвах прэзідэнта па запуску ядзернай зброі. Гэта было першае такое слуханне ў Кангрэсе за больш чым 40 гадоў.
Хоць прэзідэнт і мае права аддаць загад, генерал Хайтэн публічна падкрэсліў, што вайскоўцы ЗША заўсёды абавязаныя выконваць толькі законныя загады, у тым ліку і тыя, якія цягнуць за сабой выкарыстанне ядзернай зброі.
На слуханнях у Сенаце на гэтым тыдні эксперты пацвердзілі, што выкарыстанне ядзернай зброі павінна быць прапарцыйным існуючай пагрозе, і ў Пентагона маюцца шырокія магчымасці для выкарыстання звычайных узбраенняў супраць, да прыкладу, Паўночнай Карэі.
«Гэта сістэма, кантраляваная людзьмі … нішто не адбываецца аўтаматычна. Амерыканскія вайскоўцы выконваюць загады не слепа, і прэзідэнцкае распараджэнне на выкарыстанне ядзернай зброі павінна быць законным», — сказаў падчас слуханняў генерал Келер, папярэднік Хайтэна на пасадзе галоўнакамандуючага ядзернымі сіламі.
Келер патлумачыў, што працэс прыняцця рашэнняў пра ядзерны ўдар «ўключае ў сябе ацэнку, агляд і кансультацыі паміж прэзідэнтам і ключавымі грамадзянскімі і вайсковымі лідарамі, за якімі наступае загад і выкананне прэзідэнцкага рашэння самімі збройнымі сіламі. Калі ёсць незаконны загад, аддадзены вайскоўцам, вайскоўцы абавязаныя адмовіцца ад ягонага выканання», — падсумаваў генерал.