Reuters.com
Заснавальнік фэйсбука адказаў прэзідэнту ЗША Дональду Трампу на словы пра тое, што сацсетка заўсёды была супраць яго. Па словах Цукерберга, ён працуе ў фэйсбуку, каб «аб'яднаць людзей і пабудаваць супольнасць для ўсіх». Пра гэта ён напісаў на сваёй старонцы.
«Трамп кажа, што фэйсбук супраць яго. Лібералы кажуць, што мы дапамаглі Трампу», — апісаў Цукерберг пазіцыі палітычных праціўнікаў. «Абодва бакі незадаволеныя ідэямі і кантэнтам. Так працуе платформа для любых людзей», — падкрэсліў заснавальнік фэйсбука.
Пры гэтым Цукерберг заявіў: роля фэйсбука падчас выбараў прэзідэнта ЗША ў 2016 годзе была ключавой, але заключалася не ў тым, што сацсетку выкарыстоўвалі для распаўсюду дэзінфармацыі. Дзякуючы фэйсбуку, сцвярджае яе заснавальнік, «больш чым калі-небудзь людзей атрымалі магчымасць выказваць сваё меркаванне аб выбарах», а таксама інтэрнэт упершыню стаў асноўным спосабам камунікацыі кандыдатаў і іх прыхільнікаў. «У кожнага кандыдата была старонка ў фэйсбуку для камунікацыі з мільёнамі прыхільнікаў», - заявіў Цукерберг.
Ён адзначыў, што кандыдаты патрацілі на рэкламу ў сацсетцы мільёны, у 1000 разоў больш, чым, як мяркуецца, звязаныя з Расіяй акаўнты.
Раней фэйсбук перадаў кангрэсу і спецслужбам інфармацыю, што нібыта звязаныя з Расіяй акаўнты купілі ў сацсетцы палітычную рэкламу, выдаткаваўшы на гэта каля $ 100 тыс. Рэклама мела на мэце пасеяць нязгоду ў грамадстве, сцвярджала сацсетка.
«Мы працягнем працу па стварэнні супольнасці для ўсіх людзей. Мы будзем рабіць сваю працу, каб абараніцца ад нацыянальных дзяржаў, якія спрабуюць распаўсюдзіць дэзінфармацыю і падарваць выбары», - заявіў Цукерберг.
