Вярхоўная рада Украіны большасцю галасоў прыняла законапраект, які афіцыйна замацоўвае імкненне краіны стаць чальцом Паўночнаатлантычнага альянсу.
За гэтае рашэнне выказаліся 276 з 357 дэпутатаў парламента, якія зарэгістраваліся ў зале галасавання.
Фракцыя «Апазіцыйны блок» у поўным складзе адмовілася ад удзелу ў галасаванні.
Аўтары законапраекта, у ліку якіх спікер Рады Андрэй Парубій, першы віцэ-спікер Ірына Герашчанка і экс-міністр замежных спраў Барыс Тарасюк, тлумачылі неабходнасць паглыблення супрацоўніцтва з НАТА жаданнем забяспечыць гарантыі суверэнітэту і тэрытарыяльнай цэласнасці Украіны.
«Агрэсія Расійскай Федэрацыі супраць Украіны, анексія часткі ўкраінскай тэрыторыі паставіла перад украінскай дзяржавай неадкладную задачу адносна рэальнага гарантавання нацыянальнай бяспекі краіны», — казалася ў тлумачальнай запісцы да дакумента.
Прэзідэнт Украіны Пятро Парашэнка неаднаразова заяўляў, што ўступленне ў НАТА застаецца стратэгічнай мэтай Украіны.
У лютым гэтага года ён паведаміў, што ва Украіне пройдзе рэферэндум аб ўваходжанні ў альянс і паабяцаў зрабіць усё магчымае, каб дамагчыся сяброўства ў НАТА, калі за гэта прагаласуе народ Украіны.