Беларусы, якія ў 2015 годзе жылі ў Расіі, часцей за ўсё звяртаюцца ў падатковую, каб іх вызвалілі ад выплаты збору на дармаедства. Пра гэта падчас анлайн-канферэнцыі на сайце Белтэлерадыёкампаніі заявіў начальнік упраўлення падаткаабкладання грамадзян, дэкларавання даходаў і маёмасці галоўнага ўпраўлення падаткаабкладання фізічных асоб МПЗ Андрэй Кавалеўскі.
zyalt.livejournal.com
— Часцей за ўсё за вызваленнем (ад падатку на дармаедства) звяртаюцца асобы, якія жылі ў Расійскай Федэрацыі, — сказаў Андрэй Кавалеўскі.
Беларусы, якія пражываюць у Расіі, могуць атрымаць паведамленне на ўплату падатку з-за таго, што «ніводны дзяржорган не можа сказаць, колькі дзён грамадзянін пражываў у РФ». Нагадаем, падатковая не мае інфармацыі пра тых, хто выехаў у тыя краіны, з якімі ў Беларусі адсутнічае памежны кантроль.
Каб пацвердзіць знаходжанне ў Расіі 183 дзён і больш у годзе, трэба падаць у падатковую пэўныя дакументы. Іх спіс можа адрознівацца ў залежнасці ад сітуацыі.
Да прыкладу, тым, хто ў 2015 годзе працаваў у Расіі, трэба падаць пацверджанне ад наймальніка аб тым, што спецыяліст сапраўды працаваў у кампаніі. Пры гэтым трэба пазначыць, якую працу ён выконваў і ў які перыяд.
Раней праваабаронцы распавядалі, што большасць «дармаедаў», якія прыходзяць па юрыдычную дапамогу, — мужчыны ад 20 да 50 гадоў. Як правіла, яны працуюць у Расіі «па-чорнаму» і атрымліваюць заробак у канверце.
Па апошніх дадзеных, падатак ужо заплацілі 35 тысяч чалавек, яны пералічылі ў казну 10,5 мільёна новых рублёў. Усяго падатковая адправіла больш 440 тысяч паведамленняў на выплату падатку.
Выплаціць падатак трэба да 20 лютага.