Як распавёў начальнік службы Гідрамета Мінпрыроды Дзмітрый Рабаў, пасля па-летняму цёплых дзён на Беларусь абрынулася восень.
У суботу, 5 верасня, умовы надвор'я на тэрыторыі Беларусі ноччу будзе вызначаць атмасферны фронт, днём адаб'ецца ўплыў вільготнай няўстойлівай паветранай масы, якая паступае з Заходняй Еўропы. Ноччу ў большасці раёнаў, днём месцамі кароткачасовыя дажджы, у асобных раёнах навальніцы. Ноччу і раніцай месцамі слабы туман. Тэмпература паветра ўначы 8—14°С, максімальная днём 17—23°С.
Па Мінску будзе воблачна з праясненнямі. Ноччу кароткачасовы дождж, магчыма навальніца, днём без істотных ападкаў. Тэмпература паветра ўначы 9 — +11°С, днём 19 + 21°С.
6 верасня надвор'е будзе фармаваць актыўны атмасферны фронт, які прынясе далейшае паніжэнне тэмпературы паветра.
Часам дажджы, месцамі моцныя, навальніцы. Днём у асобных раёнах чакаецца ўзмацненне ветру парывамі да 15-18 м/с. Тэмпература паветра ўначы +8—15°С, днём 13—20°С.
У Мінску таксама будуць ісці дажджы. Тэмпература паветра ўначы 9 + 11°С, максімальная днём 13 + 15°С.
У пачатку наступнага тыдня ў краіне трывала паселіцца восень:
надвор'е ў краіне будзе вызначаць скандынаўскі цыклон і няўстойлівыя халаднаватыя паветраныя масы, якія паступаюць з Балтыйскага мора.
Дажджлівае і ветранае надвор'е захаваецца.
