Серыя, якая называецца «Усе ненавідзяць Гітлера», выйшла ў эфір 6 лютага 2013.
Згодна з фабулай гэтай серыі, у Віцебску нацысты з акультнага «Таварыства Туле» займаюцца эксперыментамі над ваеннапалоннымі, каб навучыцца ажыўляць памерлых. Рабіны ў гета ствараюць голема — штучнага чалавека з гліны, — каб той знішчыў эксперыментатараў. У выніку нападу голема камендант спальвае канцэнтрацыйны лагер, а сам знікае пры дапамозе магіі.
Ужо ў наш час галоўныя героі серыяла Сэм і Дзін расследуюць смерць рабіна Баса, які раптоўна згарэў. Справа робіцца больш заблытанай, калі яны даведваюцца, што рабін займаўся даследаваннем нацысцкіх некрамантаў. На Сэма і Дзіна нападае голем, які, аказваецца, належыць ўнуку рабіна, Аарону. Голем — ключ да разгадкі, але Аарон не ведае, як ім кіраваць, таму ўсе знаходзяцца ў небяспецы.
«Звышнатуральнае» (англ. Supernatural) — амерыканскі тэлесерыял, створаны Эрыкам Крыпке, які расказвае пра двух братоў — паляўнічых на нячысцікаў, што вандруюць па ЗША.
