«З усіх бакоў раптам пачала заліваць інфармацыя (публікацыі ў медыя, настойлівая рэклама ў сетках) пра чароўныя спосабы пахудзення — нейкія «галівудскія» таблеткі, цудадзейныя дыеты і гэтак далей. Не выключаю, што нешта з гэтага можа неяк там дзейнічаць, але ёсць усё ж больш просты і здаровы, хаця можа і не такі хуткі, як абяцае рэклама, спосаб — рух і змена рэжыму харчавання. Прычым без аніякіх дадатковых фінансавых сродкаў. Часта чую пытанні — а ты як гэта зрабіў, дык коратка распавяду пра тое, што праверыў на сабе.
Чытайце: «У мяне сваяк — пілот, ён прывозіць». Як у Беларусі прадаюць «Азэмпік», які абяцае фігуру мары
Раней я рэдка ўзважваўся, але памятаю як аднойчы, гадоў 10 таму, пабачыў на вазе… 112 кг, а пэўна было і болей.
Аляксей Дзікавіцкі некалькі гадоў таму. Фота з яго фэйсбука
Ну дык вось што зрабіў. Яшчэ раней кінуў есці мяса, але гэта не паказчык, бо тлустых рэчаў хапае і без сала.
Потым пачаў рэгулярна хадзіць пехатой на працу: кіламетр — рэшта транспартам, потым два, потым тры — столькі было да офісу. Потым пачаў вяртацца пехатой таксама, калі надвор’е дазваляла. Пасля кавіду ўжо і не купляў сабе праязны, хаця да працы цяпер ужо 5 км у адзін бок.
Пару гадоў таму пачаў паволі адціскацца ад падлогі. Таксама пачаў ад 10 разоў, а цяпер магу ў разы болей. У выніку дакаціўся да таго, што некалькі месяцаў таму пайшоў нават у спартзал — без фанатызму, але ніколі не думаў, што зраблю гэта ў 51.
Што да харчавання, дык есці позна ўвечары дакладна не варта. Мінімум надта тлустага і смажанага, тартоў розных ды маянэзаў, мучнога.
Лепей кашы, капуста ды іншая зеляніна, яблыкі, рыба, соя, малочка, цёмны шакалад і гд. Насамрэч гэтыя прадукты каштуюць даражэй, проста трэба перастроіцца і прызвычаіцца. Есці варта па-магчымасці рэгулярна, часцей, але меней — у мяне, на жаль, не заўсёды атрымліваецца. Ну і гатаваць самім.
Па сабе ведаю, што праблемай ёсць гэтак званы «алкагольны жор», але з часам пазбавіўся і ад гэтага.
Аляксей Дзікавіцкі ў красавіку 2024 года
Важны і сон. Хіба пра мяне Шалкевіч спяваў «тут людзі рана кладуцца спаць і рана ўстаюць», а хапае звычайна каля 7 гадзінаў. Сталае недасыпанне шкодзіць у гэтай справе.
Што да таблетак, дык я сапраўды прымаю метфармін, бо маю дыябет другога тыпу. Але цяпер мінімальную колькасць — штодня толькі дзве таблеткі па 500 мг, да пахудзення лекар выпісваў тры па 850 мг! Цукар стабільна ў норме. Кажуць, што метфармін спрыяе скідванню вагі, але перакананы, што адных таблетак, якія б яны не былі, дакладна недастаткова.
Так што ў маім выпадку рух і харчаванне спрацавалі — цяпер мінус 35 кг з тых 112-ці. Але гэта працэс, які расцягнуўся ў мяне на гады, ніякіх там 20 кг цягам 2 тыдняў.
Жадаю поспехаў і вам. А калі маеце пытанні — смела пішыце, ахвотна падзялюся ўсім, што на сабе праверыў».
Чытайце таксама:
Дзікавіцкі пра звальненне Шылы ў 2018-м: Іван павінен быць удзячны, што так здарылася
Дзікавіцкі: Па-людску разумею рыторыку Рамашэўскай. Але я б сышоў спакайней
