Фота з сайту Freepik
Жанчына з нікам lena_mommy распавяла на відэа, як апублікавала аб’яву аб продажы слінга.
— Я распісала ўсё падрабязна, каб людзям, якія хочуць купіць, усё было зразумела. Дадала фоты. На Вайлдберыз такі слінг каштуе 70 з чымсьці рублёў. Я прадаю за 30.
Далей блогерка стала атрымліваць паведамленні ад іншай жанчыны. Тая задавала пытанні, адказы на якія былі ў аб’яве. Гэта ўсё нервавала блогерку, але яна стрымлівалася і цярпліва адказвала.
— Далей мне прылятае: «Торг?». Трыццаць беларускіх рублёў, які торг?! Гэта наогул капейкі для слінга! Ён каштуе новы 70-72 рублі, недзе ёсць за 80. Я прадаю за 30. Які торг, алё?! Я думала, я ўраўнаважаны чалавек і мяне немагчыма вывесці з сябе. На торг я не пагадзілася. Далей дзяўчына папрасіла, каб я скінула хаця б кошт дастаўкі. Я ёй проста адказала: «Ведаеце, мне прасцей будзе слінг сабе пакінуць. Ён у мяне ляжыць спакойна, есці не просіць».
Відэа набрала 260 тысяч праглядаў і каля 7 тысяч лайкаў. А ў каментарах адкрыўся партал у пекла: аказваецца, вельмі шмат беларусаў раз'юшваюць адно аднаго.
«Я бясплатна выклала рэчы, мяне папрасілі поштай адправіць. Бліжэй да сметніцы данесці», — напісала адна з каментатарак.
«Усё бздура! Я прадавала сукенку за капейкі, надзела яе адзін раз (у аб’яве гэта было пазначана), нават адправіла па пошце. Дык пакупніца паставіла рэйтынг 4 зоркі. Пытаю, чаму. Яна адказвае: «Бо сукенка ж не новая», — падзялілася сваім досведам іншая.
Яшчэ адна жанчына распавяла, як прадавала за 750 рублёў тэлевізар, які нават быў на гарантыі (новы такі каштаваў 1300 рублёў) — пакупнік прапанаваў ёй усяго 400.
Дзяўчына, якая хацела прадаць паліто Mohito ў ідэальным стане хаця б за 100 рублёў, атрымала ад пакупніцы нахабную прапанову аддаць яго за 20, а перасылку аплаціць напалам: «Я адказала, што за 20 і сама ў ім пахаджу».
Іншая жанчына пажалілася, што спрабавала прадаць тумбу без дэфектаў за 30 рублёў: «Пасля доўгай перапіскі дзяўчына заявіла: «Калі за 20 і вы мне яе прывезяце, дык я забяру». Я доўга не ведала, што адказаць».
А былі і тыя, каму патэнцыйныя пакупнікі нават судом пагражалі:
«Нядаўна хацелі прадаць секцыю. Стаяла цана 300 рублёў. Мужык пачаў абвінавачваць, што мы самі купілі бэушную і прадаём за такія грошы, бо год таму ён бачыў гэтую секцыю за 60 рублёў. Я кажу: «Дык чаго ж не ўзялі?». Спрабаваў агрэсіўна купіць «гэтае хлам’ё» за сотку. Быў пасланы, яшчэ і судом пагражаў. А секцыю мы куплялі год таму за 400 рублёў, стан ідэальны. Хацеў таргавацца, але не атрымалася».
Нехта злуецца, што пакупнікі сапраўды не чытаюць тэкст аб’явы: «Прадавала тэлефон. Надакучылі прапановы абмяняць то на руль, то на андроід. Хаця капс локам было напісана: без абмену. У выніку выдаліла аб'яву».
Былі і зусім непрыемныя выпадкі: «Я аднойчы выставіла падгузнікі бясплатна, бо дзіця перарасло памер. Некалькі чалавек напісалі, я аддала таму, хто першы быў гатовы прыехаць у той самы дзень. Дык другая дзяўчына мяне абмацюкала. Сказала, што таксама хацела. Я была ў шоку».
І гісторыі з хамствам не адзінкавыя: «Аддавала канапу бясплатна. Ахвотныя папрасілі дастаўку. Кажу: добра, выклікаю грузавое таксі і вам даставяць, але аплаціце дастаўку. У адказ абмацюкалі».
Нехта спрабаваў знайсці пакупнікоў на сушаныя баравікі: «Ідэальныя, нядорага, 10 рублёў за 100 грам, прасілі за 7 прадаць. Я пішу: «У лесе яны летам бясплатна былі».
Мужчыны таксама абураліся: «Жонка скінула ў інтэрнэт стары абутак бясплатна з адной умовай — самавываз. Ведаеце, што напісалі? «А вы мне абутак не прывезяце»? Дык, можа, мне яшчэ і даплаціць вам за іх?!».
А камусьці «пашчасціла» трапіць на нахабных прадаўцоў: адна дзяўчына пажалілася, што прадаўшчыца ад яе патрабавала аплаціць таксі да пошты.
Чытайце таксама:
У цэнтры Мінска прапануецца вельмі дзіўная кватэра. Там адзін унітаз проста на кухні, другі — у шафе
«Прадам айфон, не спадабаўся колер». На «Куфры» перапрадаюць навагоднія падарункі
