Беларусбанк
Найбуйнейшы банк Беларусі робіць пераводы ў Польшчу ў еўра і далярах ЗША.
Камісія за перавод па нумары рахунку складае 2% ад сумы, але не меней за 100 беларускіх рублёў. SWIFT-плацеж ажыццяўляецца па пашпарце ў аддзяленні банка.
Дадаткова трэба будзе заплаціць 8 рублёў за плацежнае даручэнне. Сам Беларусбанк не мае абмежаванняў на адпраўку грошай, але дакладна даведацца, ці дойдуць яны, можна будзе толькі пасля таго, як у Беларусбанку правераць гэта па рэквізітах банка атрымальніка.
Пры пераводзе з карткі на картку спаганяюць камісію ў памеры 2,5% ад сумы пераводу.
Пры прыёме грошай з Польшчы ў Беларусь камісія складае 1% ад сумы пры пераводзе на рахунак і 1,5% пры пераводзе на картку.
Альфа-Банк
Пераводы ў Польшчу ажыццяўляе таксама Альфа-Банк. Адзіная дасяжная валюта для пераводу — еўра. SWIFT-пераводы ад гэтага беларускага банка прымаюць толькі два польскія: найбуйнейшы банк краіны PKO Bank Polski і mBank.
Сума камісіі за перавод у першую чаргу залежыць ад таго, хто з'яўляецца атрымальнікам — фізічная або юрыдычная асоба.
Каб адправіць грошы польскай фірме з Альфа-Банка, давядзецца заплаціць камісію ў памеры 2% ад сумы, але не меней за 200 рублёў. Зрабіць такі перавод можна толькі ў банкаўскім аддзяленні.
Перавод з карткі беларускай фізічнай асобы на картку польскай фізасобы можна рабіць без візіту ў банк, праз дадатак InSync. Натуральна, што для гэтага трэба мець рахунак у Альфа-Банку.
У такім выпадку камісія за аперацыю будзе складаць 150 рублёў у незалежнасці ад сумы пераводу.
Беларускі народны банк
Гэты банк гатовы адпраўляць SWIFT-пераводы ў еўра з камісіяй 1,9% ад сумы, але не меней за 100 еўра за плацеж. Таксама магчымы перавод у далярах ЗША, але толькі ў Nest Bank, у іншыя польскія банкі Беларускі народны банк можа адправіць перавод толькі ў еўра.
Прыёрбанк
Пераводы ў Польшчу таксама ажыццяўляе Прыёрбанк. Адзіная магчымая валюта пераводу — польскі злоты. Пераводзіць грошы можна як па нумары карткі, так і па нумары рахунку.
Камісія за перавод па нумары карткі складае 1,2% ад сумы. Максімальная сума аднаго перавода разам з камісіяй банка складае 2962 рублі. Усяго за месяц з беларускай карты на польскую такім чынам можна адправіць не больш за 19 749 рублёў разам з камісіяй за перавод.
Калі гаворка ідзе пра SWIFT-перавод па нумары банкаўскага рахунку, то камісія будзе складаць 0,5% ад сумы пераводу, але не менш за 50 рублёў. Максімальная сума камісіі — 2500 рублёў. Умовы аднолькавыя пры пераводзе як юрыдычнай, так і фізічнай асобе.
Прыёрбанк гатовы адправіць вашы грошы ў любы польскі банк, але перад правядзеннем фінансавай аперацыі раіць самастойна ўдакладняць, ці банк-атрымальнік прыме грошы.
Камісія за прыём грошай з Польшчы ў Беларусь праз Прыёрбанк складае 3% ад сумы пераводу, але не меней за 15 рублёў.
Тэхнабанк
У гэтым банку могуць зрабіць перавод у Польшчу толькі ў еўра. Адпраўляюць ва ўсе польскія банкі, апроч ING Bank. Незалежна ад таго, хто будзе атрымальнікам, фізічная або юрыдычная асоба, камісія за SWIFT-перавод складае 55 еўра плюс 1,5 працэнта ад сумы.
BSB-Банк
SWIFT-пераводы ў далярах і еўра робіць і БСБ-Банк. У залежнасці ад тарыфу, камісія за перавод у далярах ЗША складае 1,7%, але не меней за 100 еўра і не болей за 300.
З еўра камісія аналагічная, як і з далярамі, але ў адрозненне ад амерыканскай валюты еўра трэба абавязкова набываць у самога БСБ-Банка. Таму, калі ў банк вы прыходзіце з еўра ці далярамі, вам усё адно давядзецца згубіць пэўны працэнт на курсе.
Пры пераводзе па нумары карткі банк адпраўляе ў іншыя краіны беларускія рублі, таму пралічыць страты на такі перавод немагчыма, бо невядома, па якім курсе будзе лічыць банк-карэспандэнт.
Важныя нюансы
Перад тым, як ісці ў банк для адпраўкі SWIFT-пераводу або пераводу па нумары карткі праз дадатак, варта загадзя ўдакладніць, у якой менавіта валюце канкрэтны банк можа зрабіць перавод. Таксама варта ўдакладняць, ці працуе банк-адпраўнік з банкам, у які вы адпраўляеце грошы.
На практыцы выглядае, што шансы паспяхова адправіць грошы ў Польшчу даволі вялікія. Напрыклад, адзін з чытачоў нядаўна разлічваўся за набыты ў Польшчы аўтамабіль SWIFT-пераводам у еўра з беларускага Альфа-Банка ў PKO Bank Polski. Грошы на рахунку польскай фірмы з'явіліся ў дзень адпраўкі з Беларусі.
Іншы чытач разлічваўся такім жа чынам за аўтамабільныя запчасткі. Прадавец атрымаў грошы на наступны дзень пасля пераліку з Беларусі.
Адна з суразмоўніц напачатку восені пераводзіла грошы за моўныя курсы з карткі на картку. Грошы прыйшлі на наступны дзень. Ва ўсіх выпадках у атрымальнікаў былі рахункі ў PKO Bank Polski.
Калі казаць пра пераводы ў іншыя краіны з Беларусі, то бываюць складанасці. Адзін з чытачоў няўдала разлічыўся за аўтамабіль, які хацеў набыць у Германіі. Мужчына адправіў грошы, але атрымальнік замест грошай з Беларусі атрымаў ад свайго банка паведамленне, што грошы прыходзілі, але банк іх не прымае. У выніку чытач страціў грошы, выдаткаваныя на камісію банку, і шмат нерваў, пакуль без малога два месяцы чакаў, калі грошы вернуцца на ягоны рахунак.
Чытайце таксама:
Польшча спыніла выдачу гуманітарных віз, адносна якіх хадайнічаў Беларускі дом у Варшаве
Чаму ў Беларусі адбываецца бум на рынку нерухомай маёмасці? Тлумачыць эканаміст
Літва ўзмоцніць кантроль за экспартам у Беларусь, каб супрацьстаяць абыходу санкцый
